मुख्यमंत्री निवास म जन चौपाल, भेंट-मुलाकात कार्यक्रम : श्री भूपेश बघेल आम नागरिक मन ले करिन समुहे भेंट

रायपुर, मुख्यमंत्री श्री भूपेश बघेल ले आज मुख्यमंत्री निवास म आयोजित भेंट- मुलाकात जन चौपाल कार्यक्रम म प्रदेश के कई जगा ले आये आम नागरिक मन, कई ठन संगठन मन अऊ संस्था मन के पदाधिकारी मन ले संवागें भेंट अऊ मुलाकात करिन। भेंट-मुलाकात जन चौपाल म बड़ संख्या म आये नागरिक मन ह जिहां मुख्यमंत्री ल अपन समस्या अऊ कठिनाई मन के जानकारी दीन उन्‍हें श्री भूपेश बघेल के सरकार ल ऊंखर कोति ले लेहे गे महत्वपूर्ण निर्णय, कार्य अऊ उपलब्धि मन बर बधाई अऊ शुभकामना घलोक दीन।

नवा सरकार बने के बाद आम मनखे मन ले भेंट मुलाकात के ये पहिली कार्यक्रम म मुख्यमंत्री ह एक-एक मनखे मन ले मिलके उंखर समस्या अऊ कठिनाई मन ल सुनिन अऊ समझिन अऊ ऊंखर आवेदन मन म अधिकारी मन ल जरूरी कार्रवाई करे के निर्देश घलोक दीन। बताना जरूरी हे कि आम नागरिक मन से मुख्यमंत्री के भेंट- मुलाकात के जन चौपाल आयोजन अब हर बुधवार के दिन मुख्यमंत्री निवास म भिनसरहा 11 बजे ले होही। मुख्यमंत्री निवास म कोनो आम नागरिक ये बेरा म मुख्यमंत्री श्री भूपेश बघेल ले मुलाकात कर सकत हें। मुख्यमंत्री खुद पूरा आयोजन के समय इहां उपस्थित रहिके मनखे मन ले ऊंखर सुख-दुख के जानकारी लीन।

ये बेरा म मंत्री सर्वश्री रविन्द्र चौबे, मोहम्मद अकबर, गुरू रूद्रकुमार, महापौर श्री प्रमोद दुबे, विधायक श्री कुलदीप जुनेजा घलोक उपस्थित रहिन। मंत्री मन ह घलोक ये बेरा म नागरिक मन के समस्या मन ल सुनिन अऊ वोमा जरूरी कार्रवाई करे के निर्देश दीन।

परसापाली म गोठान पास
मुख्यमंत्री श्री बघेल ह जनचौपाल कार्यक्रम म जांजगीर-चापा जिला के विकासखंड बम्हनीडीह के ग्राम परसापाली म गोठान निर्माण के स्वीकृति दीन। परसापाली म गोठान निर्माण बर श्री रामधन नेताम ह आवेदन दे रहिस।

मुख्यमंत्री ह भेंट मुलाकात जन चौपाल के वेबसाइट के शुभारंभ करिस
मुख्यमंत्री ह जन चौपाल कार्यक्रम चालू होए के पहिली जन चौपाल के वेबसाइट के शुभारंभ करिस। एकर एड्रेस www.janchaupal.cg.nic.in हे। जन चौपाल के आयोजन बर ये सॉफ्टवेयर ल विशेष रूप ले बनाये गए हे। मुख्यमंत्री के उप सचिव अऊ जनसम्पर्क विभाग के आयुक्त सह संचालक श्री तारण सिन्हा ह बताइस कि आवेदक मन ल ऊंखर मोबाइल के माध्यम ले आवेदन के पंजीयन के अऊ निराकरण के जानकारी दीए जाही।

जन चौपाल म व्यापारी मन ह मुख्यमंत्री के प्रति करिस आभार व्यक्त
जन चौपाल आयोजन म बहुत अकन प्रतिनिधि मंडल अऊ नागरिक मन ह मुख्यमंत्री ल ऊंखर कोति ले करे जात जरूरी काम, योजना अऊ निर्णय मन बर हार्दिक बधाई अऊ शुभकामना घलोक दीन। छत्तीसगढ़ चेम्बर ऑफ कॉमर्स एंड इंडस्ट्रीज के अध्यक्ष श्री जितेंद्र बरलोटा, चेयरमेन श्री पूरनलाल अग्रवाल, पदाधिकारी श्री लाल चंद गुलदानी, मनमोहन अग्रवाल, दीपक बल्लेवाल, भारत अग्रवाल ह मुख्यमंत्री ल छत्तीसगढ़ म गुमाश्ता लाइसेंस के बार-बार प्रक्रिया ले मुक्ति देवाए बर धन्यवाद दीन। उमन कहिन कि ए मांग लंबा समय ले व्यापारि मन कोति ले करे जात रहिस। अब ये लाइसेंस ल केवल एक बार बनवाना परही। हर 5 साल म लाइसेंस बनाए के प्रक्रिया ले व्यापारी मन ल नइ गुजरना परही।

पैरामेडिकल तकनीशियन मन के सीधा भर्ती म गड़बड़ी के जांच के निर्देश
जन चौपाल म मुख्यमंत्री ह मेडिकल कॉलेज रायपुर म पैरामेडिकल तकनीशियन मन के सीधा भर्ती म गड़बड़ी के जांच के निर्देश स्वास्थ्य अऊ परिवार कल्याण विभाग के सचिव ल देहे हें। जन चौपाल म पैरा मेडिकल तकनीशियन एसोसिएशन के प्रतिनिधि मंडल ह प्रांताध्यक्ष श्री नरेश साहू के नेतृत्व म मुलाकात करिन अऊ ओ मन ल भर्ती म अनियमितता के बारे म बताइन।

कण्डरा मन के बांस देहे के आवेदन उपर कारवाही
छत्तीसगढ़ कण्डरा आदिवासी कोसरिया समाज राजिम के प्रतिनिधि मंडल के अध्यक्ष श्री भीमलाल कण्डरा ह श्री बघेल ल बताइस कि साल 1972 ले ऊंखर समाज के हर एक परिवार ल प्रति साल 1500 बांस दीए जात रहिस, जेखर से ए परिवार मन के जीविका चलत रहिस, फेर साल 2014 ले बांस नइ दे जात हे, एखर से ओ मन ल कठिनाइ के सामना करना परत हे। मुख्यमंत्री ह उंखर समस्या के समाधान बर जरूरी पहल करे के आश्वासन दीन। उमन ऊंखर आवेदन ल परीक्षण अऊ जरूरी कार्रवाई बर वन विभाग भेजे के निर्देश दीन।

जंजगिरी के नहर के मरम्‍मत उपर कारवाही
मुख्यमंत्री ले दुर्ग जिला के जंजगिरी गांव ले आए किसान मन के प्रतिनिधि मंडल ह मुलाकात करिन अऊ बताइन के गांव म डायवर्सन बांध अऊ नहर के निर्माण साल 1971-72 म होय रहिस। एखर से तीर-तखार के गांव मन ल मिलाके करीबन एक हजार एकड़ म सिंचाई होत रहिस, फेर कई बछर ले बांध अऊ नहर के मरम्मत नइ होए ले बिक्‍कट कम सिंचाई हो पात हे। किसान मन ह बांध अऊ नहर के मरम्मत कराए के आग्रह मुख्यमंत्री ले करिन। मुख्यमंत्री ह ओ मन ल जरूरी पहल के आश्वासन दीन अऊ किसान मन के आवेदन परीक्षण अऊ कार्रवाई बर जल संसाधन मंत्री ल भेजे के निर्देश दीन।

दिव्यांग मन ल स्वेच्छानुदान ले आर्थिक सहायता स्वीकृत
मुख्यमंत्री श्री भूपेश बघेल ह कवर्धा के वार्ड नंबर 11 निवासी दिव्यांग श्री दीपक गुप्ताा ल जीवन यापन बर दस हजार रुपए के आर्थिक सहायता स्वीकृत करिन। अइसनहे श्री बघेल ह एच-6, पुलिस लाइन पेंशनबाडा रायपुर निवासी कुमारी निशिता मिश्रा, कुमारी नित्मा अऊ शिखांश मिश्रा ल शिक्षा बर स्वेच्छानुदान मद ले 90 हजार रुपए के आर्थिक सहायता के स्वीकृति दीन।

राशिदा बेगम ल सिलाई बर सहायता राशि मंजूर
रायपुर के झंडा चौक संजय नगर के श्रीमती राशिदा बेगम आज मुख्यमंत्री ले मिलके खुशी-खुशी घर लहुटिस। उंखर समस्या मुख्यमंत्री ले मिलके दूर हो गीस। जनचौपाल कार्यक्रम म रशीदा बेगम ह मुख्यमंत्री ल बताइस कि ओखर पति मजदूरी करथे अऊ बीमार घलोक रहिथे। घर के आर्थिक स्थिति ठीक नइ चलत हे। उमन बताइस कि वो घर म ही सिलाई के काम करना चाहथे, जेखर से ऊंखर घर के आर्थिक स्थिति म सुधार हो सकय। फेर ओखर पास सिलाई मशीन खरीदे बर ओखर तिर पइसा नइ हे। मुख्यमंत्री ह राशिदा बेगम के कठिनाई ल देखत ऊंखर आवेदन म सिलाई के कामकाज शुरू करे 5 हजार रूपिया के मंजूरी दीन।

कमला बाई ल किडनी के इलाज बर सहायता राशि मंजूर
कमला बाई ल अब किडनी के इलाज कराए म आत आर्थिक समस्या दूर हो जाही। जन चौपाल म मुख्यमंत्री ह ओ मन ल इलाज बर 20 हजार रुपए के आर्थिक सहायता राशि मंजूर करे हे। मुख्यमंत्री श्री भूपेश बघेल ल हीरापुर म रहइया श्रीमती कमला बाई राजेश ह बताइस कि वो बहुत गरीब हे, ओकर लड़का चाट के ठेला लगथे। कमला बाई ह बताइस कि वो पाछू 10 बछर ले किडनी के बीमारी ले पीड़ित हे। गरीबी के सेती बीमारी के ठीक से इलाज नइ करा पात हे। ओखर लड़का के आमदनी घलोक बहुत कम हे जेखर सेती बिक्‍कट दिक्कत होवत हे। ये म मुख्यमंत्री ह मौका म ही इलाज बर 20 हजार रूपिया के स्वीकृति दीन।

नरवा, गरूवा, घुरवा, बारी योजना बर मुख्यमंत्री ल दीन धन्यवाद
सरगुजा के लुंड्रा विकासखंड के ग्राम झेराडीह ले आए श्री मनोज त्रिपाठी ह आज जन चौपाल म मुख्यमंत्री श्री भूपेश बघेल ले भेंट करके नरवा, गरूवा, घुरवा, बारी योजना शुरु करे बर छत्तीसगढ़ सरकार के प्रति आभार व्यक्त करिस। मुख्यमंत्री ले मिलके ओ ह धन्यवाद दीस ओ ह अपन पत्नी अऊ तीन लइका मन के संग सरगुजा ले रायपुर आए रहिन। मुख्यमंत्री ले मुलाकात के समय श्री त्रिपाठी ह कहिन कि हर गांव म सुव्यवस्थित गोठान होए ले मनखे पशुपालन बर प्रेरित होही। उन्‍हें टीकाकरण अऊ इलाज ले पशु मन के स्वास्थ्य बनेच होही। गौवंशीय अऊ भैंसवंशीय पशु मन के संरक्षण अउ संवर्धन के ये अनूठा योजना ले गौमाता के जुन्ना महत्ता हमर ग्रामीण संस्कृति म वापस स्थापित होही। उमन मुख्यमंत्री ले बुजुर्ग मन के सेवा बर मुख्यमंत्री माता-पिता सेवा योजना शुरु करे के निवेदन करिन।

गरीब लईका मन मिलके धन्‍यवाद दीन
रायपुर के श्री उदीम एजुकेशन सोसायटी म पढ़इया निर्धन छात्र अऊ छात्रा मन ह आज मुख्यमंत्री निवास पहुंच के जन चौपाल कार्यक्रम म सामिल होइन अऊ ऊंखर स्कूल तीर चलत शराब दुकान बंद करवाए म देहे गए मदद बर मुख्यमंत्री श्री भूपेश बघेल ल धन्यवाद दीन। मुख्यमंत्री ह ए लइका मन ले बात करिन अऊ ओ मन ल शाबाशी दीन। उमन उदीम संस्था ल एक लाख रूपिया के आर्थिक सहायता देहे के घोषणा करिन। बताना जरूरी हे कि ए लइका मन ह शराब के दुकान बंद करवाए धरना दे रहिन। ये गरीब लइका इहां निशुल्क पढ़ाई करत हे। एमा ले कई लइका अनाथ हे अऊ कई लइका परिवार के कमजोर परिस्थिति मन के सेती छोटे मोटे काम करके परिवार ल सहारा घलोक देवत हे।

फार्मेसी पढ़ईया लईका मन के ज्ञापन उपर कारवाही
शासकीय पंडित दीनदयाल उपाध्याय स्मृति आयुष अऊ विज्ञान विश्वविद्यालय फार्मेसी के पढ़ईया लईका मन ह प्रदेश अध्यक्ष राहुल वर्मा के नेतृत्व म आज भेंट मुलाकात, जनचौपाल कार्यक्रम म मुख्यमंत्री श्री भूपेश बघेल ले ऊंखर निवास म मुलाकात करिन। संघ ह अपन समस्या मन ले मुख्यमंत्री ल अवगत कराइन अऊ लउहे निराकरण कराए के अनुरोध करिन। मुख्यमंत्री ह समस्या के संबंध म पढ़ईया लईका मन ले प्राप्त ज्ञापन उपर उचित कार्रवाई बर प्रमुख सचिव ल प्रेषित करिस।

सीआईडीसी के अधिकारी कर्मचारी मन ह करिन आभार व्यक्त
कार्यक्रम म मुख्यमंत्री श्री भूपेश बघेल ले राज्य परिवहन निगम सीआईडीसी के अधिकारी मन अऊ कर्मचारी मन ह मिलके 7 वां वेतन मान के लाभ देवाए बर आभार व्यक्त करिन। राज्य शासन के ये निर्णय ले राज्य परिवहन निगम के 900 अधिकारी कर्मचारी लाभान्वित होही। एखर से ओ मन ल 4 हजार ले 20 हजार रुपए के लाभ मिलही। ये बेरा म प्रतिनिधि मंडल म श्री अनीस अहमद बारी, एस डी सोरी, श्री शेख जमील घलोक सामिल रहिन।

मुख्यमंत्री के संवेदनशीलता ले जरूरतमंद मरीज मन ल मिलीस इलाज बर मदद
मुख्यमंत्री श्री भूपेश बघेल ले आज इहां ऊंखर निवास म बहुत अकन जरूरतमन्द मरीज मन ह इलाज बर आर्थिक सहायता प्रदान करे के आग्रह करिन। मुख्यमंत्री ह उंखर समस्या मन ल सहानुभूति पूर्वक सुनिन अऊ मदद के आश्वासन दीन। बीजापुर जिला के भोपालपट्टनम तहसील के ग्राम मददेड़ ले आए श्री संतोष उप्पल ह बताइस कि उंखर दुनों किडनी खराब हे। ओ मन ल हर महिना पांच बार डायलिसिस करना परथे अऊ एखर बर जगदलपुर जाना परथे। इलाज म उंखर जम्‍मो जमा पूंजी खरचा हो गे हे, आगू के इलाज बर आर्थिक मदद के जरुरत हे। मुख्यमंत्री ह सहानुभूति पूर्वक उंखर समस्या सुनिन अऊ मदद के आश्वासन दीन। श्री बघेल ह ऊंखर इलाज बर संजीवनी कोष ले आर्थिक मदद बर स्वीकृति प्रदान करिन। महासमुंद जिला के ग्राम मुढ़ीपार के श्रीमती स्वर्णलता सिंह के तीन महिना पहिली बस दुर्घटना म पसली टूट गए रहिस। ओखर इलाज चलत हे। उमन घलोक मुख्यमंत्री ले आर्थिक सहायता के आग्रह करिन। मुख्यमंत्री ह श्रीमती सिंह ल इलाज बर संजीवनी कोष ले पचास हजार रूपिया के स्वीकृति प्रदान करिन। दर्री घाट बिलासपुर के निवासी श्री दीपक दास मूत्र संबंधित रोग ले पीड़ित हे। मुख्यमंत्री ह ओ मन ल रायपुर के डी.के.एस. अस्पताल म निःशुल्क इलाज के सुविधा देवाए के निर्देश दीन। संजीवनी कोष ले मदद बर 9 मरीज मन ह आवेदन दीन ऊंखर आवेदन परीक्षण अऊ जरूरी कार्रवाई बर भेजे गे हे।

विराजदास दाहिया ल इलाज बर तीन लाख रुपए के सहायता
हाई वोल्टेज बिजली के तार झुलसे घायल विराजदास ल मुख्यमंत्री श्री भूपेश बघेल ह इलाज बर तीन लाख रुपए के आर्थिक सहायता स्वीकृत करे हें। सिविल लाइन रायपुर निवासी विराजदास दाहिया क्रिकेट खेलत समय 11 हजार के वी के करंट प्रवाहित विद्युत तार के संपर्क म आके गंभीर रूप ले झुलस गे रहिन। उंखर इलाज कालडा कास्मेटिक सर्जरी इंस्टीट्यूट, एडवांस बर्न अऊ ट्रामा सेंटर रायपुर म चलत हे। इलाज म जादा खरचा हो जाय के सेती उंखर माली हालत बिगड गए रहिस। इलाज बर ऊंखर पास पइसा नइ रहिस। आज मुख्यमंत्री श्री भूपेश बघेल के पहला जनचौपाल, भेंट -मुलाकात के आयोजन विराजदास बर सौभाग्य शाली साबित होइस। विराजदास के आवेदन आज मुख्यमंत्री श्री भूपेश बघेल तीर पहुंचिस। श्री बघेल ह ऊंखर आवेदन म जल्दी, संवेदनशील कार्रवाई करिन अऊ विराजदास के इलाज बर तीन लाख रुपए के तत्त्काल स्वीकृति दीन।

सप्‍त ऋषि सेवा समिति के आवेदन के निराकरन
मुख्यमंत्री श्री भूपेश बघेल ले आज इहां ऊंखर निवास म जन चौपाल भेंट- मुलाकात कार्यक्रम म धमतरी जिला के सिहावा ले आए सप्त ऋषि साधु सेवा समिति के प्रतिनिधि मंडल ह तको मुलाकात करिन। उमन महानदी के उदगम स्थल म कल्पेश्वर महादेव गणेश घाट स्थित संत श्री मुरली बाबा आश्रम म पेयजल व्यवस्था, सामुदायिक भवन, शौचालय आदि काम करे बर आवेदन दीन। मुख्यमंत्री के निदेश म उंखर आवेदन म जरूरी कार्रवाई बर संचालक धर्मस्व अऊ धार्मिक न्यास ल भेजे गीस।

व्यापारी संघ मन के प्रतिनिधि मंडल ह मुख्यमंत्री के प्रति आभार जताइन
मुख्यमंत्री श्री भूपेश बघेल के रायपुर स्थित निवास म आज ले चालू होए जन चौपाल, भेंट-मुलाकात कार्यक्रम म कई ठन व्यापारी संघ मन के प्रतिनिधि मंडल ह मुख्यमंत्री ले मुलाकात करिन। उमन गुमाश्ता लाइसेंस नवीनीकरण प्रक्रिया ल लाइफ टाइम करे के राज्य शासन के फैसला बर मुख्यमंत्री के प्रति आभार प्रकट करिन। प्रतिनिधिमंडल ह कहिन कि ये निर्णय ले व्यापारी मन ल बार-बार लाइसेन्स नवीनीकरण म होवइया परेशानी मन ले राहत मिलही। प्रतिनिधि मंडल म राईस मिल एसोसिएशन, प्रिंटर्स एसोसिएशन, रायपुर मशीनरी मर्चेंट एसोसिएशन अऊ गंज डबरी मर्चेंट एसोसिएशन संग कई ठन व्यापारी संघ के प्रतिनिधि सामिल रहिन। इमन म व्यापारी नेता श्री राजेन्द्र जग्गी के नेतृत्व म मुलाकात करिन। सर्वश्री गुरजीत सिंह संधु, अमर परचानी, मनोज जैन, सोहेब अंसारी, अखिल अग्रवाल अऊ प्रमोद जैन घलोक ये बेरा म उपस्थित रहिन।

लउछरहा..