नक्सल प्रभावित 11 हजार 886 पहुंचविहीन गांव मन म सौर ऊर्जा ले पहुंचिस बिजली

बस्‍तर, छत्तीसगढ़ राज्य के बियाबान, पहुंचविहीन अउ नक्सल प्रभावित क्षेत्र मन के ग्यारा हजार 886 घर मन म बीते साल के आखरी महीना तक बिजली नइ पहुंचे रहिस हे। क्षेत्र म निवासरत् ग्रामीण अउ आदिवासी परिवार रात के बेरा म अंधियार म जीवन यापन करे बर मजबूर रहिन। राज्य के नवा सरकार ह मुख्यमंत्री श्री भूपेश बघेल के नेतृत्व म संवेदनशीलता के परिचय देवत ए सबो परिवार मनल सौर ऊर्जा ले विद्युत प्रदाय बर क्रेडा ल जिम्मेदारी सौंपिस क्रेडा ह सरकार के जनकल्याणकारी नीति मन म अमल करत पाछू तीन महिना म ही करीबन 11886 घर मन ल सौर ऊर्जा के माध्यम ले विद्युतीकृत कर दीस। एमां ले जादातर अविद्युतीकृत घर एल.डब्ल्यू.ई. जिला मन के हे, जिहां ये काम करना बहुत चुनौती वाला रहिस। ए गांव मन म परम्परागत विद्युत ग्रिड ले बिजली पहुंचाना संभव ही नइ रहिस। क्रेडा के तत्परता अऊ नवा सरकार के पहल ले ए अंधियार घर मन म अंजोर छा गे अऊ गांव वाला मन कहे लागिन ’’अंजोर आइस त खुशि आईस’’।



क्रेडा ल प्रदेश सरकार कोति ले वन बाधित अउ नक्सल प्रभावित क्षेत्र मन म निवासरत् अउ विद्युत व्यवस्था ले वंचित परिवार मन ल सौर संयंत्र के माध्यम ले बिजली प्रदान करे के निर्देश दीए रहिस अउ क्रेडा के तत्परता ले सिरिफ जनवरी ले मार्च के तीनेच महीना म लउहे काम करके 11886 घर मन मन म बिजली पहुचा दे गइस। अभी हाल म सिरिफ अतिसंवेदनशील नक्सल प्रभावित क्षेत्र मन के काम बस बांचे हे, जऊन ल लउहे पूरा करे के उदीम करे जात हे।




लाभान्वित परिवार मन ल 200 वॉट क्षमता के सौर संयंत्र के संग 05 नग उच्‍च क्षमता के एल.ई.डी. लाईट्स, 15 वॉट के पंखा, मोबाईल चार्जिंग, प्वाइंट अउ टी.वी. सॉकेट निःशुल्क देहे गए हे। गांव वाले मन कोति ले बताए जात हे के घर म बिजली आए ले लइका मन के पढ़ई अउ आन जरूरी काम बहुत सुगम हो गए हे। गांव वाले मन अब अपन रोजगार जइसे- टोकनी, झाडू आदि बनाए के काम रात म घलोक कर पावत हें। पहिली पंखा नइ होए के सेती गांव वाले मन भीषण गर्मी झेले ल मजबूर रहिन, अब ए परेशानी ले उमन ल मुक्ति मिल गए हे। रात के बेरा म भयमुक्त वातावरण, जहरीला जीव-जन्तुओं ले सुरक्षा, शिक्षा म उन्नति, जीवन म सुधार के सपना ल अब सौभाग्य योजना पूरा करत हे।



क्रेडा कोति ले ए सबो सौर संयंत्र के सरलग मानिटरिंग करे जात हे अउ हर एक क्लस्टर म अलग-अलग तकनीशियन इकाई मन कोति ले ए सबो संयंत्र के रख-रखाव करे जात हे। क्रेडा के मुख्य कार्यपालन अधिकारी श्री आलोक कटियार ह बताइस कि एल.डब्ल्यू.ई. जिला मन के वनाच्छादित, दूरस्थ घर मन म बिजली पहुंचाना एक चुनौतीभरे काम रहिस। जऊन ल सरकार के प्राथमिकता के तहत अपेक्षित गति ले पूरा करे गीस।



लउछरहा..