रायपुर अऊ कांकेर जिला म आज ले विकासखण्ड स्तरीय युवा उत्सव

रायपुर, प्रदेश के युवा मन अऊ नागरिक मन ल छत्तीसगढ़ के संस्कृति ले जोड़ने अऊ उंखर प्रतिभा ल मंच प्रदान करे के उद्देश्य ले जिला अऊ विकासखण्ड स्तर म युवा महोत्सव अऊ नेशनल ट्रायवल डांस (राष्ट्रीय आदिवासी नृत्य) 2019-20 के आयोजन करे जात हे। राज्य शासन कोति ले गढ़बो नवा छत्तीसगढ़ के थीम म 27 अऊ 29 दिसम्बर 2019 ले ये आयोजन राजधानी रायपुर के साईंस कॉलेज मैदान म करे जाही।
प्रदेश के रायपुर जिला म विकासखण्ड स्तरीय युवा उत्सव के आयोजन धरसींवा विकासखण्ड के ग्राम परसतराई, तिल्दा विकासखण्ड के तिल्दा अऊ अभनपुर विकासखण्ड के पिपरौद म विकासखण्ड स्तरीय आयोजन आज होही। एखर अलावा रायपुर शहर बर अलग ले युवा महोत्सव के आयोजन करे जाही। अइसनहे कांकेर जिला म विकासखण्ड स्तरीय युवा महोत्सव के आयोजन शासकीय उच्चतर माध्यमिक विद्यालय नरहरदेव परिसर म आज करे जाही, जेमां कई ठन कार्यक्रम जइसे एकल नृत्य, सामूहिक नृत्य, शास्त्रीय नृत्य, शास्त्रीय गायन, लोकगीत, वादन, चित्रकला, निबंध अऊ तात्कालिक भाषण प्रातः 10 बजे ले अऊ बांचे आन विधा मंझनिया 12 बजे ले चालू होही।
धमतरी जिला म युवा महोत्सव के आयोजन दू चरण म जिला अऊ विकासखण्ड स्तर म करे जाही। ये मा पहिली स्तर म लोकनृत्य, लोकगीत, एकांकी नाटक अऊ आन सांस्कृतिक विधा अवइया एक दिसम्बर के जिला स्तर म नगर पंचायत ऑडिटोरियम अऊ स्‍वामी विवेकानंद इंडोर हॉल कुरूद म करे जाही। विकासखण्ड स्तर म 21 नवम्बर के नगरी विकासखण्ड म इंडोर बैडमिंटन कोर्ट, श्रृंगि ऋषि शासकीय उच्चतर माध्यमिक शाला परिसर म 23 नवम्बर के धमतरी विकासखण्ड म स्थानीय बाबू पंढरीराव कृदत्त इंडोर स्टेडियम हॉल आमातालाब धमतरी, 25 नवम्बर के मगरलोड विकासखण्ड म शासकीय कन्या शाला भैंसमुंडी अऊ 28 नवम्बर के कुरूद विकासखण्ड म नगर पंचायत ऑडिटोरियम अऊ स्वागत विवेकानंद इंडोर हॉल कुरूद म आयोजित करे जाही।
अइसनहे नेशनल ट्रायबल डांस (राष्ट्रीय आदिवासी नृत्य) प्रतियोगिता म आदिवासी नृत्य आयोजित करे जाही, जेखर थीम विवाह, फसल कटाई, पारम्परिक त्यौहार अऊ आन ओपन वर्ग म होही।