रायपुर, मुख्यमंत्री श्री भूपेश बघेल आज बालोद जिला के तहसील मुख्यालय डौण्डीलोहारा के मंडी प्रांगण म आयोजित निषाद समाज के वार्षिक अधिवेशन समारोह म सामिल होइन। निषाद समाज कोति ले मुख्यमंत्री के फुलमाला ले आत्मीय स्वागत करे गीस। ये बेरा म मुख्यमंत्री श्री बघेल ह समारोह ल संबोधित करत कहिन के निषाद समाज मेहनतकश समाज हे। हर युग म निषाद समाज के महत्वपूर्ण योगदान रहे हे। उमन कहिन के प्रदेश म नवा सरकार बने के संगेच किसान मन के हित म कई निर्णय लेहे गे हे। किसान मन के धान 2500 रूपिया प्रति क्विंटल के दर ले बिसाये गीस। प्रदेश के बीस लाख किसान मन के ग्यारा हजार करोड़ रूपिया के अल्पकालीन कृषि ऋण माफ करे गीस। चार सौ यूनिट तक बिजली बिल आधा करे गीस।
मुख्यमंत्री ह कहिन के किसान मन के समृद्धि हम सबके प्राथमिकता हे। उमन कहिन के वनक्षेत्र म निवास करइया ल वन अधिकार पट्टा देहे के कार्यवाही करे जात हे। मुख्यमंत्री ह निषाद समाज के मांग म मंगल भवन बर दस लाख रूपिया के स्वीकृति दीन। मुख्यमंत्री ह शिक्षा, खेल व विविध क्षेत्र म उत्कृष्ट प्रदर्शन करइया निषाद समाज के प्रतिभा मन ल चिनहा अउ प्रशस्ति पत्र प्रदान करके सम्मानित करिन।
समारोह ल गुण्डरदेही विधानसभा क्षेत्र के विधायक श्री कुंवर सिंह निषाद अऊ बालोद विधानसभा क्षेत्र के विधायक श्रीमती संगीता सिन्हा ह घलोक संबोधित करिन। निषाद समाज कोति ले मुख्यमंत्री ल स्मृति चिन्ह भेंट करे गीस। ए अवसर म निषाद समाज के बहुत अकन पदाधिकारी मन संग जिला के जनप्रतिनिधि, गणमान्य नागरिक, कलेक्टर श्रीमती रानू साहू, पुलिस अधीक्षक श्री एम.एल.कोटवानी अउ बड़ संख्या म निषाद समाज के सामाजिक बंधु उपस्थित रहिन।
