मुख्यमंत्री ह जब डिमरापाल आश्रम के लइका मन के इच्छा करिन पूरा

  • लइका मन ल घुमाइन पूरा मुख्यमंत्री निवास
  • पद्मश्री धर्मपाल सैनी के नेतृत्व म डिमरापाल आश्रम के लइका मन ह मुख्यमंत्री ले करिन मुलाकात

रायपुर, श्री भूपेश बघेल ले आज जन चौपाल भेंट मुलाकात म पद्मश्री धरमपाल सैनी के सियानी म डिमरापाल आश्रम के लइका मन ह सौजन्य मुलाकात करिन। ए लइका मन ह मुलाकात के बेरा मुख्यमंत्री श्री बघेल ले उंखर निवास घूमे के इच्छा प्रकट करिन। श्री बघेल ह लइका मन के ये बालसुलभ इच्छा ल तुरंते पूरा करिन। मुख्यमंत्री के निर्देश म सबो लइका मन ल हरे-भरा परिवेश म स्थित मुख्यमंत्री निवास ल अंदर ले पूरा घुमाए गीस। ए लइका मन ह बड़ उत्सुकता के संग मुख्यमंत्री निवास म स्थित गौशाला, बाड़ी, डिस्पेंसरी, कैबनेट कक्ष अऊ कार्यालय आदि ल देखिन।
बालिका बसंती कवासी ह कहिन कि गांव के घर के जइसे ही मुख्यमंत्री निवास म घलोक बाड़ी देखे ल मिलीस। गांव के घर के जइसन ही इहां गौशाला हे। पहली पइत रायपुर आए बालिका वनिता कश्यप ह कहिस कि मुख्यमंत्री जी ले मिलके अऊ ओखर घर देखके बहुत ही अच्छा लगिस। मुख्यमंत्री ह एखर पहिली बड़ आत्मीयता अऊ अपनत्व के संग श्री धर्मपाल सैनी अऊ लइका मन ले मुलाकात करिन। श्री बघेल ह लइका मन ले पूछिन कि ओ मन कहां जावत हें, लइका मन ह बताइन कि ओ मन आचार्य विनोवा भावे जी के आश्रम वर्धा पवनार जावत हें। मुख्यमंत्री ह लइका मन ले विनोवा भावे जी के बारे म घलोक पूछिन त लइका मन ह बताइन कि ओ मन गांधी जी के शिष्य रहिन अऊ उमन भू-दान आंदोलन चालू करे रहिन। श्री बघेल ल लइका मन ह ये घलोक बताइन कि ओ मन तीन दिन तक पवनार आश्रम म रइहीं। मुख्यमंत्री ह लइका मन ल उंखर यात्रा बर शुभाकामना दीन।

लउछरहा..