रायपुर दक्षिण विधानसभा म संपन्न होइस भाजपा कार्यकर्ता सम्मेलन

लोकसभा चुनाव म प्रचंड जीत देवाए के लीन संकल्प

जिहां बृजमोहन अग्रवाल जइसे अपराजेय योद्धा अऊ पराक्रमी कार्यकर्ता होवय उहां मैं 50 हज़ार के लीड बर आश्वस्त हंव -डॉ रमन

करजा म बूड़े कांग्रेस सरकार उपर रमन ह कंसिस तंज-
“गरवा, घुरवा,नरवा, बारी
पईसा कहां ले लाबे संगवारी”

रायपुर, रायपुर दक्षिण विधानसभा म आयोजित कार्यकर्ता सम्मेलन म छत्तीसगढ़ के पहिली मुख्यमंत्री अऊ भाजपा के राष्ट्रीय उपाध्यक्ष डॉ रमन सिंह ह कांग्रेस उपर जमके प्रहार करत कहिन के ये झूठ बोलइया पार्टी ये। कांग्रेसी चुनाव जीते बर गीता अऊ गंगाजल हाथ म लेके छत्तीसगढ़ म शराबबंदी करे के कसम खाथे अऊ चुनाव जीते के बाद जम्‍मो कसम मन लभुला जाथे। फेर अब जनता कांग्रेस के कोनो छलावा म नइ अवइया हे। ए लोकसभा चुनाव म भाजपा रिकॉर्ड वोट ले जीत दर्ज करे जात हे।अकेल्‍ला रायपुर दक्षिण विधानसभा जिहां बृजमोहन अग्रवाल जइसे अपराजेय योद्धा अऊ पराक्रमी कार्यकर्ता हे उहां मैं 50 हज़ार ले लीड बर आश्वस्त हंव।
रायपुर के ब्रम्हपुरी स्थित पुजारी पार्क म होइस आयोजन
इहां मुख्य अतिथि के आसंदी ले अपन बात रखत डॉक्टर रमन सिंह ह कहिन के रायपुर दक्षिण विधानसभा के जऊन कार्यकर्ता मन ल देखके पराजय अपन दिशा बदल लेथे ऊंखर बीच आके मोर ताकत बाढ़े हे अऊ नवा ऊर्जा के संचार होय हे। उमन कहिन के आज हम चुनौती अऊ बड़का संकल्प के संग मैदान म हवन। जिहां बूथ स्तर के कार्यकर्ता हमर ताकत बनके डटे हें। इही कार्यकर्ता मन के बदौलत हमर 15 साल सरकार रहे हे। उमन कहिन के रायपुर के अइसन कोनो कोना नइ हे जिहां विकास नइ पहुंचे होवय। रायपुर लोकसभा प्रत्याशी पूर्व महापौर सुनील सोनी के कल्पना शीलता ले चहुंमुखी विकास ऊंखर कार्यकाल म होए हे। डॉ. रमन सिंह ह कहिन के बहुत झन मनखे मन ह टिकट मांगे रहिन। फेर सुनील सोनी ह कभू टिकट नइ मांगिस, फेर पार्टी ह एक जिम्मेदार निष्ठावान कार्यकर्ता ल टिकट सौपे हे।
उमन कहिन के रायपुर म जऊन विकास के काम दिखत हे वो भाजपा सरकार के ही कराए आए। अऊ जऊन काम आज रोके जात हे ओ मन ल सांसद बनके सुनील सोनी जी अऊ मोदी जी के सरकार पूरा कराही। डॉ रमन सिंह ह कहिन के भारत आज शक्तिशाली राष्ट्र के रूप म दुनिया के आघू हे। दुनिया के 11 वां अर्थव्यस्था ले 5वां बड़का अर्थव्यवस्था आज हमर भारत बन गए हे। 300 किलोमीटर दूर अंतरिक्ष म स्थित सेटेलाइट ल ध्वस्त करके दुनिया म देश के शक्ति अऊ दबदबा मोदी सरकार ह बढ़ाए हे। आज हम देखत हवन कि पाकिस्तान भारत के आघू गिड़गिड़ात हे। आज मोदी पीएम हे त पाकिस्तान ल हमार जाबाज पायलट ल कुछ घंटा म छोड़ना परथे। काबर के ओ ल पता हे नइ छोड़ही त मोदी के नेतृत्व वाले भारत देश के सेना अपन सैनिक ल पाकिस्तान मे सर्जिकल स्ट्राइक करत लेके चले देही।
उमन छत्तीसगढ़ के कांग्रेस सरकार उपर तंज कसत कहिन के ट्रेजरी म वेतन दे बर पइसा नइ हे। ए कांग्रेस ह प्रदेश के दिवाला निकाल देहे हे। पंचायय के पइसा वापस ले लेहे गए हे। 30 लाख युवा मन ल बेरोजगारी भत्ता देहे के वादा घलोक ओ ह भुला गे हे। बर्बादी के कगार म छत्तीसगढ़ ल ला के खड़ा कर देहे गए हे। व्यंग्यातम लहजा म उमन

भुपेश सरकार ले पूछिन-
“गरवा, घूरवा,नरवा, बारी
पइसा कहां रखे हस संगवारी”

डॉ रमन ह कहिन के एक बड़का लक्ष्य ल लेके हम चलत हवन। ये वैचारिक लड़ाई के चुनाव हे। एक कोति महा ठगबंधन दुसर कोती राष्ट्रवादी मन के फौज।
रायपुर दक्षिण विधायक बृजमोहन अग्रवाल ह कहिन के आज ले 21 दिन बाद रायपुर लोकसभा म नवा इतिहास बनाना हे। जिंकर कार्यकाल म रायपुर के तस्वीर अऊ तकदीर बदले हे। 700 करोड़ के लागत ले दर्जनों पानी के टंकी मन बने हे, रिंग रोड, जेल रोड, केनाल रोड, संतोषी नगर, राजेन्द्र नगर के पुलिया आदि के निर्माण होय हे अइसन पूर्व महापौर सुनील सोनी सांसद बने जात हे।

बृजमोहन ह कार्यकर्ता मन ले कहिन के काग्रेस के महापौर आज अपन कार्यकाल के एक उपलब्धि तक नइ गिना सकय। उमन कहिन के वइसे ये चुनाव सड़क, पानी, बिजली के नइ हे। ये चुनाव देश के रक्षा अऊ स्वाभिमान के चुनाव हे। पाकिस्तान के खिलाफ सेना ल ताकत देहे के चुनाव हे। हम सियान, नौजवानों, बहिनी मन तीर जाबो अऊ कमल फूल म वोट दे बर तैयार करबोन। हम दक्षिण ले 50 हज़ार ले जीत दर्ज करबोन। सभा ल भाटापारा विधायक शिवरतन शर्मा अउ सांसाद प्रत्‍यासी सुनील सोनी अउ जिला भाजपा अध्यक्ष राजीव अग्रवाल तको संबोधित करिन।

ए कार्यकर्ता सम्मेलन म पूर्व सांसद गोपाल व्यास, जिला भाजपा अध्यक्ष राजीव अग्रवाल, मोतीलाल साहू, सुभाष तिवारी, मोहन एंटी, हेमलता चंद्राकर, श्याम सुंदर अग्रवाल, मीनल चौबे, डॉक्टर सलीम राज, मिर्जा एजाज बैग, अजय शुक्ला, कचरू साहू, डॉक्टर सुखनंदन सोनकर, संजू नारायण सिंह, सालिक सिंह ठाकुर, आकाश शर्मा, सचिन मेघानी, शैलेंद्र परगनिया, राजेश पांडे, चूड़ामणि निर्मलकर, मुकेश पंजवानी, विनय ओझा, बिहारी लाल साहू, पेट सफा सुमित शर्मा, शदाशिव सोनी संग सैकड़ों के संख्या म भाजपा कार्यकर्ता मौजूद रहिन।

लउछरहा..