पैरा आर्म रैसलिंग चैम्पियनशिप म श्रीमंत स्विट्जरलैंड रवाना

रायपुर, जिन्दल स्टील म काम करइया श्रीमंत झा ह स्विस पैरा आर्म रेसलिंग चैंपियनशिप बर रवाना होइस।  स्विस पैरा आर्म रेसलिंग चैंपियनशिप स्विट्जरलैंड म 26 सितंबर ले 2 अकटूबर 2019 के बीच खेले जाना हे । श्रीमंत काल स्विट्जरलैंड बर रवाना होइस। निकलत बेरा म श्रीमंत ह अपन उत्साह ए शब्द मन म परगट करिस कि ओ ल स्विट्जरलैंड के प्रतियोगिता ले मोर कैरियर ल एक नवा उछाह मिलही, आगू वो ह कहिस के मोर सबो संगी मन के शुभकामना लेके मैं जावत हव, ये ह मोला जीते प्रेरना देवत रइही। वो ह जिंदल स्टील पावर लिमिटेड ल सहरावत कहिस के जिहां मैं काम करे हंव, उहां ले आर्थिक सहयोग के चलते मैं ये काम ल बने सहिन धियान लगा के कर पावत हंव।
श्रीमंत एखर पहिली घलोक छत्तीसगढ़ अऊ अपन देश भारत बर पदक जीते हे जेमां कुछ गोल्ड अऊ कुछ सिल्वर स्तर के पदक हे। यात्रा चालू करे के पहिली करीबन 7 दिन ले वो ह अपन फिटनेस अऊ प्रतियोगिता बर तियारी करे हे खासकर ये मा वो ह अपन ध्यान जीत बर केंद्रित रखे हे।