साजा म पत्रकार संग ओरझ गए पुलिस

बेमेतरा ले अरुण सोनी, एक कोति छत्तीसगढ़ सरकार पत्रकार मन के सुरक्षा बर कानून लाय के बात करत हे उन्हें पत्रकार मन के संग बदसलूकी के मामला दिन-ब-दिन बाढ़तेच जात हे। बिना जांच करे बिना कोनो पुस्टि के वरिष्ठ पत्रकार मन के संग घलोक अपराधी जइसे व्यवहार साजा थाना के पुलिस कर्मचारी मन कोति ले करना अड़बड़े दुख के बात हे। पत्रकार मन के संग होवत अइसन अत्याचार के ये मामला ल लेके जिला के जम्मो पत्रकार एक होके अनशन म बइठ गए हें अउ दोसी मन के खिलाफ कार्यवाही के मांग म अड़े हें।
घटना अईसे हे के साजा विकासखंड के वरिष्ठ पत्रकार ल सूचना मिले रहिस के साजा थाना म अवैध शराब के माफिया सक्रिय रूप ले कारोबार करत हे। ये खबर कवरेज करे बर पत्रकार ह उन्हा पहुंच के वीडियो बनात रहिन। येला देख के थाना के अधिकारी-कर्मचारी मन ऊंखर हाथ ले मोबाइल झटक लीन अऊ पत्रकार से आरोपी के जइसे मारपीट गाली-गलौज करे गीस।