रायपुर, पिंकी डायमंड, जय सतनाम स्व सहायता समूह के सदस्य हे अऊ राष्ट्रीय ग्रामीण आजीविका मिशन नवागढ़, जिला बेमेतरा के अंतर्गत संबलपुर संकुल म ग्राम पंचायत रमपुरा के आश्रित ग्राम खटई के सक्रिय महिला के रूप म कार्यरत हे अपन ग्राम संगठन (भारत माता ग्राम संगठन) अऊ समूह के सुचारू क्रियान्वयन करे के संगें-संग इमन ल बुक कीपिंग म दक्षता प्राप्त हे, राष्ट्रीय ग्रामीण आजीविका मिशन अंतर्गत प्राप्त सहायता राशि ले इमन खुद के कम्प्युटर खरीदके सम्बंधित व्यवयास जइसे के प्रिंट आउट, फोटोकॉपी, ईमेल, मनी ट्रान्सफर आदि काम करके अपन आजीविका सुचारू रूप ले चलावत हें। एखरे संगे-संग समूह के आन महिला मन ल कम्प्यूटर ले सम्बंधित बुनियादी चीज मन के ज्ञान पाए म मदद करत हें।
अनुसूचित जाति वर्ग ले बहुत गरीब परिवार ले सम्बंधित होए के बाद घलव पिंकी ह अपन परिवार के घलोक पूरा ध्यान रखे हे, अपन परिवार बर वो ह एक किराना के दुकान घलव खोले हे, जेखर से सुचारू रूप ले ओकर घर के जरुरी खरचा म मदद मिल सकय, अपन अउ अपन परिवार के आजीविका के ख्याल रखे के अलावा पिंकी ह सक्रिय महिला के रूप म घलव काम करत हे। पिंकी ह अपन संगें-संग अपन ग्राम पंचायत के सबो महिला मन ल सुदृढ़ आजीविका ले जोड़े अउ गरीबी उन्मूलन ले सम्बंधित सरकार के कार्यक्रम मन ल सफलता के उंचाई तक पहुंचाए के काम करत हे। आज राष्ट्रीय ग्रामीण आजीविका मिशन जइसे संवेदनशील योजना के सेती पिंकी चार ले पांच हजार रूपिया हरमहीना कमावत हे।
