आदिवासी नृत्य महोत्सव म राम वन गमन पर्यटन परिपथ के घलोक दिखिस झलक

रायपुर, राजधानी के साइंस कॉलेज मैदान म आयोजित राष्ट्रीय आदिवासी नृत्य महोत्सव म राम वन गमन पर्यटन परिपथ के झलक घलोक मनखे मन ल देखे ल मिलत हे। देश-विदेश ले आए कलाकार मन अऊ स्थानीय मनखे मन एखर सराहना घलोक करे जात हे। छत्तीसगढ़ पर्यटन विभाग के स्टॉल म छत्तीसगढ़ के महत्वपूर्ण स्थल मन के संगेच राम वन पर्यटन परिपथ ल घलोक प्रदर्शित करे गए हे।

हम आप ल बता देवन के मुख्यमंत्री श्री भूपेश बघेल ह छत्तीसगढ़ म राम वन गमन पर्यटन परिपथ निर्माण के घोषणा करे हे। जेखर तहत राम वन गमन रद्दा म परइया महत्वपूर्ण स्थल मन ल पर्यटन स्थल के रूप म विकसित करे जात हे। ये मा पहिली चरण म सीतामढ़ी हरचौका, रामगढ़, शिवरीनारायण, तुरतुरिया, चंदखुरी, राजिम, सिहावा के सप्तऋषि आश्रम, जगदलपुर अऊ सुकमा जिला के राम पथ ल राज्य शासन के पर्यटन विभाग कोति ले पर्यटन परिपथ के रूप म विकसित करे जात हे। एखरे संगेच रायपुर जिला के चंदखुरी स्थित माता कौशल्या के प्राचीन मंदिर परिसर के घलोक जीर्णोंद्धार अउ सौंदर्यीकरण के काम घलोक चालू कर दे गए हे।

पर्यटन मंत्री श्री ताम्रध्वज साहू ह सुकरवार के दिन पर्यटन मण्डल के स्टॉल के अवलोकन करके एला सहराइन। ये बेरा म संस्कृति मंत्री श्री अमरजीत भगत, महिला अउ बाल विकास मंत्री श्रीमती अनिला भेड़िया अउ विधायक श्री मोहन मरकाम संग बहुत अकन जनप्रतिनिधि घलोक उपस्थित रहिन। पर्यटन विभाग के स्टॉल मुख्य रुप ले इको अउ एथनो थीम उपर तियार करे गए हे। जेमा चित्रकोट अउ तीरथगढ़ जलप्रपात के लाइव मॉडल्स मनखे मन के आकर्षण के केंद्र बने हे। एखर अकतहा बस्तर दशहरा के रथ, सिरपुर के लक्ष्मण मंदिर संग छत्तीसगढ़ के आन पर्यटन स्थल मन के मॉडल्स अउ एखर से संबंधित वीडियो ल बड़े एलईडी स्क्रीन के माध्यम ले मनखे मन ल देखाय जात हे। स्टॉल म आगंतुकों बर 30 प्रतिशत छूट म छत्तीसगढ़ पर्यटन मंडल के रिसार्ट्स म स्पॉट बुकिंग के सेवा घलोक उपलब्‍ध हे। स्टॉल म आकर्षक सेल्फी जोन घलोक बने हे, जिहां मनखे उत्सुकता ले अपन सेल्फी लेवत हें।

लउछरहा..