मुख्यमंत्री सामिल होइस रामदेव बिरसो जतरा अउर सांस्कृतिक कार्यक्रम म

रायपुर, मुख्यमंत्री श्री भूपेश बघेल आज जशपुर जिला के मनोरा विकासखण्ड के ग्राम पंचायत घाघरा म आयोजित रामदेव बिरसो जतरा अउर सांस्कृतिक कार्यक्रम म सामिल होइन। उमन स्वर्गीय रामदेव भगत के सामाजिक कार्य मन के स्मरण करत ओ मन ल विनम्र श्रद्धांजलि अर्पित करिन। मुख्यमंत्री ह कहिन के स्वर्गीय श्री रामदेव भगत ह हमेशा आदिवासी मन अऊ समाज के कमजोर तबके के मनखे मन के बेहतरी बर काम करत रहिन। ऊंखर काम मन ल हमेशा याद रखे जाही। मुख्यमंत्री श्री बघेल ह कहिन के अवइया समय म जशपुर क्षेत्र के युवा मन ल स्थानीय स्तर म रोजगार देहे के हरसंभव प्रयास करे जाही। पंचायत अउ ग्रामीण विकास अऊ लोक स्वास्थ्य अउ कुटुंब कल्याण मंत्री श्री टी.एस. सिंहदेव ह कहिन कि स्वर्गीय श्री रामदेव भगत के स्मृति म आयोजित कार्यक्रम म आए के ओ मन ल सौभाग्य मिले हे। क्षेत्र के विधायक श्री विनय भगत ह मुख्यमंत्री के क्षेत्र के जनता के तरफ ले हार्दिक अभिनंदन करिस। कार्यक्रम म प्रदेश के स्कूल शिक्षा, अनुसूचित जाति, जनजाति, आन पिछड़ा वर्ग अउ अल्पसंख्यक कल्याण अऊ सहकारिता मंत्री डॉ. प्रेमसाय सिंह टेकाम क्षेत्र के बहुत अकन जनप्रतिनिधि अऊ ग्रामीणजन बड़ संख्या म उपस्थित रहिन।

लउछरहा..