सुग्घर समाज बर युवा अपन शक्ति के सही उपयोग करव
रायपुर, सुग्घर समाज बर युवा अपन शक्ति के सही उपयोग करव। स्वामी विवेकानंद के छत्तीसगढ़ ले घलोक नाता रहे हे। ओ मन रायपुर के बूढ़ापारा म रूके रहिन। जउन जगा वो मन रूके रहिन वो जगा ल स्मारक के रूप म बनाए जाही। रामकृष्ण मिशन आश्रम अबूझमाड़ी मन अऊ ऊंखर लइका मन के बेहतर भविष्य बर पाछू 34 साल ले सरलग सफल उदीम करत हे। स्कूल शिक्षा अउर अनुसूचित जाति, जनजाति मंत्री डॉ. प्रेमसाय सिंह टेकाम ह ये आशय के विचार आज स्वामी विवेकानंद जयंती म राष्ट्रीय युवा महोत्सव के अवसर म नारायणपुर रामकृष्ण मिशन आश्रम म मुख्य अतिथि के आसंदी ले व्यक्त करिन।
कार्यक्रम ल क्षेत्रीय विधायक श्री चंदन कश्यप, आश्रम के सचिव मालिक व्याप्तानंद ह घलोक संबोधित करिन। आभार प्रदर्शन स्वामी कृष्णामृतानंद ह करिन। कार्यक्रम म नगर पालिका अध्यक्ष श्रीमती सुनीता मांझी, जिला प्रशासन के अधिकारी, शिक्षक-शिक्षका मन, गणमान्य नागरिक अउर बड़ी संख्या म स्कूली लइका उपस्थित रहिन।
