राशनकार्ड नवीनीकरण शिविर : लाभ लेहे उछाह ले पहुंचत हें महिला मन

  • गीता के राशनकार्ड म जुड़ही लइका अऊ पति के नाम
  • अब सात किलो के बलदा मिलही 35 किलो चाउंर

रायपुर, नगर निगम बिलासपुर के विकासनगर वार्ड नंबर एक के श्रीमती गीता चंद्राकर ल अब बहुत खुशी होवत हे, काबर कि राशन कार्ड नवीनीकरण ले ओला फायदा होवइया हे। ओ ह अपन पति अऊ लइका मन के नाम जोड़े बर आवेदन करे हे। ओखर नाम राशन कार्ड म जुड़े ले गीता ल सात किलो के बलदा अब 35 किलो चाउंर मिल सकही।

गीता गरीबी रेखा ले नीचे जीवन-यापन करथे। वो अऊ ओखर पति काकरो-काकरो घर म खाना बनाये के काम करथें अउ अपन गुजारा करथें। उंखर राशन कार्ड म पति अऊ लइका मन के नाम नइ जुड़ पाए रहिस, ए खातिर उनला महीना म सिरिफ सात किलो चाउंर मिलत हे, जऊन उंखर परिवार बर कमती रहिस। ओला बाजार ले महंगा दाम म अकतहा चाउंर बिसाना परत हे। एखर से उंकर उपर आर्थिक बोझ परत हे। अब राशन कार्ड नवीनीकरण के अभियान म ओला परिवार के आन सदस्य मन के नाम जोड़े के मौका मिले हे अऊ नाम जुरे के बाद ओला 35 किलो चाउंर हर महिना मिलही।

अटल आवास सकरी निवासी श्रीमती कमला मिंज के पति अऊ तीन लइका हे। वो प्राथमिकता नीला कार्डधारी हितग्राही हे। ओखर पति के नाम राशन कार्ड ले काट दे गए रहिस। ए खातिर ओला सिरिफ 28 किलो चाउंर मिलत रहिस। वो ह राशन कार्ड नवीनीकरण अभियान म अपन पति के नाम जोड़े बर आवेदन करे हे, जेखर से ओला 35 किलो चाउंर हर महिना मिल सकही।

तालापारा के किन्नर लाली मानिकपुरी अऊ ओखर बहिनी ल अन्त्योदय गुलाबी कार्ड ले 35 किलो चाउंर मिलत रहिस। ओखर बहिनी के मौत हो गे हे। ओ हर राशन कार्ड नवीनीकरण शिविर म राशन कार्ड म संशोधन बर आवेदन भरे हे।

भारत चौक तालापारा निवासी 80 वर्षीय वृद्धा उमा बाई अउ 70 वर्षीय सुक बाई ल 35-35 किलो चाउंर के संगेच निराश्रित पेंशन घलोक मिलत हे। दुनों उत्साहपूर्वक अपन राशन कार्ड के नवीनीकरण बर शिविर म पहुंचिन। घर के महिला मुखिया होए के नाते सुक बाई ह अपन दू नातिन, बेटा अऊ बहू के नाम जोड़े बर आवेदन करे हे।

राशन कार्ड नवीनीकरण अभियान म बिलासपुर जिला म 4 लाख 90 हजार 944 प्रचलित राशन कार्ड मन के नवीनीकरण करे जाही। अब तक करीबन डेढ़ लाख कार्डधारी हितग्राही मन ह आवेदन जमा कराए हें। ये अभियान 29 जुलाई तक चलही, जेमां एक लाख 22 हजार 323 अन्त्योदय गुलाबी कार्ड, तीन लाख 61 हजार 697 प्राथमिकता (नीला) कार्ड, पांच हजार 858 अन्त्योदय गुलाबी (एकल निःशुल्क) कार्ड, 406 स्पेशल गुलाबी कार्ड अऊ 651 निःशक्त जन (हरा) राशन कार्ड मन के नवीनीकरण करे जाही।

राज्य शासन कोति ले संशोधित पात्रता के मुताबिक प्राथमिकता वाले परिवार मन के एक सदस्य वाले राशन कार्ड म हर महिना 10 किलोग्राम खाद्यान्न, दू सदस्य वाले राशनकार्ड म 20 किलोग्राम हर महिना, तीन ले पांच सदस्य वाले राशनकार्ड म 35 किलोग्राम हर महिना अऊ पांच ले जादा सदस्य वाले राशनकार्ड म 7 किलोग्राम हरेक सदस्य हरेक माह के मान ले खाद्यान्न के वितरण करे जाही।

लउछरहा..