रायपुर, मुख्य सचिव श्री आर.पी. मण्डल ह आज इहां मंत्रालय महानदी भवन म गणतंत्र दिवस 26 जनवरी 2020 के गरिमापूर्ण आयोजन के संबंध म बैठक लीन। उमन कहिन कि गणतंत्र दिवस के अवसर म आयोजित होवइया सबो सांस्कृतिक कार्यक्रम अऊ विभागीय झांकी मन के विसय गणतंत्र दिवस के गरिमा के जइसे होना चाही। विभाग मन कोति ले विकासमूलक अऊ नवाचारी गतिविधि मन ले जुड़े झांकी मन के रूप म विशेष रूप ले धान खरीदी, नरवा-गरवा-घुरवा-बारी, हॉट बाजार क्लीनिक, स्मार्ट सिटी, पर्यटन, आजिविका मिशन के जानकारी दिए जाही। सांस्कृतिक कार्यक्रम अऊ झांकी मन के विषय के अवलोकन मुख्य सचिव ह खुदे करहीं। बैठक म कई विभाग मन ल गणतंत्र दिवस मुख्य समारोह के सफलतापूर्वक आयोजन के जिम्मेदारी सौंपिन।
गणतंत्र दिवस 26 जनवरी के मुख्य समारोह के आयोजन रायपुर स्थित पुलिस लाईन परेड ग्राउंड म करे जाही। बैठक म प्रधान मुख्य वन सरंक्षक श्री राकेश चतुर्वेदी, अपर मुख्य सचिव वित्त श्री अमिताभ जैन, प्रमुख सचिव वन श्री मनोज पिंगवा, पुलिस विभाग के डॉ. आनंद छाबड़ा, कलेक्टर रायपुर डॉ. भारतीदासन, पुलिस अधीक्षक रायपुर श्री आरिफ शेख संग समस्त विभाग मन के सचिव स्तरीय अधिकारी उपस्थित रहिन।
