70वां संविधान दिवस के मौका म मुख्यमंत्री भूपेश बघेल ह करिस बड़का घोषणा, स्कूल मन म लइका मन ल हरेक सोमवार पढ़ाए जाही संविधान के पाठ

रायपुर, मुख्यमंत्री भूपेश बघेल ह आज संविधान दिवस के मौका म बड़का घोषणा करे हें। मुख्यमंत्री भूपेश बघेल ह सदन म कहिन कि छत्तीसगढ़ के स्कूल मन म लइका मन ल अब संविधान के प्रस्तावना, मौलिक अधिकार, कर्त्तव्य अऊ राज्य के नीति निर्देशक तत्व मन के घलोक जानकारी दिए जाही। मुख्यमंत्री भूपेश बघेल ह कहिन कि लोकतंत्र के मूलभूत सिद्धांत मन ल जन-जन तक पहुंचाए के एक अच्छा जरिया हमार स्कूल हो सकत हे। स्कूल मन म प्रार्थना के बाद महिना के पहिली सोमवार के संविधान के प्रस्तावना, दूसर सोमवार के नागरिक मन ल दे गे मौलिक अधिकार मन के जानकारी, तीसर सोमवार के कर्तव्य मन के जानकारी अऊ चउथईया सोमवार के नीति निर्देशक तत्व मन के पठन-पाठन करे जाना चाही। ताकि हमार पढ़ईया लईका मन ल ऊंखर बारे म जानकारी हो सकय, उमन म जागरूकता बाढ़य अऊ भविष्य म ओ मन देश के ज़िम्मेदार नागरिक बन सकयं।

मुख्यमंत्री भूपेश बघेल ह सदन म अपन संबोधन म कहिन कि आज हमला अपन महान संविधान के बर अपन विश्वास, ओखर रक्षा करे के अपन संकल्प अऊ ओखर मूल्य मन ल आत्मसात करके, देश म लोकतंत्र ल जिंदा राखे के वचनबद्धता ल पुरजोर तरीका ले दोहराए के जरूरत हे। मुख्यमंत्री भूपेश बघेल ह कहिन कि ये जरूरी हे कि संविधान के भावना जन-जन तक पहुंचय।

संविधान ह देशवासी मन ल समता के अधिकार, इंसानी गरिमा दीस अऊ भारत ल दुनिया म एक अलग पहिचान दीस। हमर संविधान देशवासी मन बर सिरिफ कागज के टुकड़ा नो हे भलुक हमर लोकतांत्रिक आस्था के चिनहा ये।

मुख्यमंत्री भूपेश बघेल ह कहिन कि हमर संविधान देश के अपन तासीर, ओखर मौलिक चिंतन, ओखर समतावादी आकांक्षा मन के प्रतिबिम्ब भर नो हे, भलुक ये येकरो चिनहा हे कि ये देश के हर मनखे अपन संवैधानिक अधिकार मन बर देश के सबले बड़का चौखट तक लड़ाई लड़ सकत हे। मुख्यमंत्री भूपेश बघेल ह देश के संविधान निर्माता मन ल नमन करत संविधान के प्रस्तावना ल सदन म दोहराइन। मुख्यमंत्री भूपेश बघेल ह संविधान सभा के अध्यक्ष डॉ. राजेंद्र प्रसाद, संविधान निर्मात्री समिति के अध्यक्ष डॉ. भीमराव अंबेडकर, राष्ट्रपिता महात्मा गांधी, पंडित जवाहरलाल नेहरू, सरदार वल्लभभाई पटेल, मौलाना अबुल कलाम आजाद अऊ पंडित श्यामा प्रसाद मुखर्जी ल सुरता करत ओ मन ल नमन करिन।

लउछरहा..