मुख्यमंत्री ह सद्गुरु कबीर प्राकट्य दिवस के अवसर म कबीर पंथी रैली ल रवाना करिस
रायपुर, मुख्यमंत्री श्री भूपेश बघेल ह आज बिहनिया इहां सद्गुरु संत कबीर के प्राकट्य दिवस के अवसर म अपन निवास ले कबीर पंथी जुलूस अऊ बाइक रैली ल झंडी देखा के रवाना करिस। मुख्यमंत्री ह ए अवसर म कहिन कि सद्गुरु कबीर ह सम्पूर्ण मानव जगत ल सामाजिक सदभाव अऊ समरसता के रस्ता देखाइस। उमन वो समें के समाज म व्याप्त सामाजिक कुरीति मन ल दूर करे बर समाज सुधार के काम मन म उल्लेखनीय योगदान दीन।
श्री बघेल ह कहिन कि पूरा विश्व म कबीर ल मानइया करोड़ों मनखे हें। छत्तीसगढ़ के जनजीवन म घलोक संत कबीर के व्यापक प्रभाव हे। सद्गुरु कबीर के सन्देश आज घलोक प्रासंगिक हे, आज ऊंखर बताये रद्दा म चले के सबले जादा जरूरत हे। एखर पहिली मुख्यमंत्री ह कबीर पंथी रैली के आत्मीय स्वागत करिस।
छत्तीसगढ़ कबीर पंथी साहू समाज के संरक्षक श्री द्वारिका प्रसाद साहू ह ए अवसर म मुख्यमंत्री ल संत कबीर के फोटू भेंट करिस। कबीर पंथी रैली मुख्यमंत्री निवास ले राजधानी रायपुर के कबीर चौक, कचहरी चौक होत धरसीवां तक गीस, उहां संत कबीर के भजन, कीर्तन अऊ सत्संग के कार्यक्रम आयोजित करे गीस।
ए अवसर म छत्तीसगढ़ कबीर पंथी साहू समाज के अध्यक्ष श्री कन्हैया लाल साहू, महासचिव श्री संतोष साहू अऊ सचिव श्री भूपेंद्र साहू संग बहुत अकन पदाधिकारी अऊ सदस्य बड़ संख्या म उपस्थित रहिन।
