रायपुर, सशस्त्र सेना झण्डा दिवस सात दिसम्बर के अवसर म सैनिक कल्याण कार्यक्रम ले जुड़े अधिकारी मन ह आज इहां मंत्रालय महानदी भवन म छत्तीसगढ़ शासन के मुख्य सचिव श्री आर.पी.मण्डल ल विशेष ध्वज के बैज लगाके झण्डा दिवस मनाइन। ये बेरा म एयर कमांडर (सेवानिवृत्त) श्री ए.एन. कुलकर्णी, जिला सैनिक कल्याण अधिकारी विंग कमांडर (सेवानिवृत्त) ए. श्रीनिवास राव संग जिला सैनिक कार्यालय के वरिष्ठ अधिकारी उपस्थित रहिन।
हम आप ल बता देवन के भारतीय सशस्त्र बल मन के तीनों अंग आर्मी, नेवी अऊ एयरफोर्स के सैनिक मन के बलिदान के स्मरण अऊ ओ मन ल श्रद्धांजलि देहे बर हर साल सात दिसम्बर के सशस्त्र सेना झण्डा दिवस मनाए जाथे। एखर शुरूआत सन् 1949 ले होए रहिस। झण्डा दिवस के रूप म युद्ध के समय होए जनहानि ले उबरे म सहयोग, सेना म कार्यरत कर्मि मन अऊ ऊंखर परिवार के कल्याण, सेवानिवृत्त कर्मि अऊ ऊंखर परिवार के कल्याण बर फंड जमा करे जाथे।
