रायपुर, कंपनी सामाजिक उत्तरदायित्व (सीएसआर) निर्वहन म बिक्कट सुग्घर काम मन बर जेएसपीएल फाउंडेशन के सह-अध्यक्ष श्रीमती शालू जिन्दल ल अमेरिका म स्थापित संस्था ‘लाइव वीक’ कोति ले महात्मा गांधी जयंती के 150 साल पूरा होए के अवसर म महात्मा अवार्ड ले सम्मानित करे गए हे।
गांधी जयंती के उपलक्ष्य म गुरुग्राम के एक होटल म आयोजित कार्यक्रम म श्रीमती शालू जिन्दल ल ये अवार्ड पद्म भूषण सम्मान प्राप्त समाजसेवी राजश्री बिरला ह प्रदान करिस। श्रीमती जिन्दल करीबन 3 दशक ले ग्रामीण अंचल म रहइया मन के सेवा म समर्पित हे। उमन गांव वाले मन के जीवन स्तर ऊपर उठाए अऊ ऊंखर बर कई प्रकार के सामाजिक काम मन म अपन महत्वपूर्ण योगदान देहे हें। श्रीमती जिन्दल ह ये सम्मान प्राप्त होए के बाद कहिन कि ये मोर सौभाग्य हे कि मोला अइसन मनखे मन के सेवा करे के अवसर मिले हे। उमन कहिन कि फाउंडेशन के उदीम मन ले करीबन 20 लाख मनखे मन ह अपन जीवन म सुधार करे हें अऊ अपन अवइया पीढ़ी के भविष्य बनेच बनाए के काम करे हें। मैं भगवान ले बिनती करत हंव के वो मोला अऊ जादा शक्ति अऊ सामरथ देवय के मैं जनता के सेवा कर सकंव।
जेएसपीएल फाउंडेशन श्री नवीन जिन्दल के नेतृत्व वाले कंपनी जिन्दल स्टील एंड पावर लिमिटेड (जेएसपीएल) के सामाजिक सेवा शाखा हे, जऊन हर लकीर के आखिरी मनखे के जीवन म प्रकाश लाकर कंपनी सामाजिक दायित्व के एक अनूठा उदाहरण प्रस्तुत करिस हे।
