आखरी सांस तक संग देथे शिक्षा -श्री कवासी लखमा

उत्तर बस्तर (कांकेर), प्रदेश के वाणिज्य (आबकारी) अउ उद्योग मंत्री श्री कवासी लखमा ह छात्रावास दिवस म पीएमटी छात्रावास कांकेर म आयोजित कार्यक्रम ल संबोधित करत कहिन के शिक्षाच ह एक अइसे धन हे, जऊन ल कोनो चोरा नइ सकंय, जे ह बांटे ले बाढ़थे अऊ आखरी सांस तक संग देथे। कलम म बड़ ताकत होथे, सबो मनखे पढ़ंय अऊ आगू बढ़ंय। उमन कहिन के मुख्यमंत्री श्री भूपेश बघेल ह पदभार ग्रहण करतेच सबले पहिली किसान मन के करजा माफ करिस, सरकार कोति ले तेंदूपत्ता के पारिश्रमिक दर घलोक बढ़ा देहे गीस। तेंदूपत्ता संग्राहक मन ल अब प्रति मानक बोरा 4 हजार रूपिया के दर ले पारिश्रमिक मिलत हे। उमन कहिन के हमर सरकार बस्तर संभाग के विकास म संसाधन मन के कोनो कमी नइ आन देवय। छात्र मन के मांग म श्री लखमा ह पीएमटी छात्रावास बर नवा भवन बनाए बर आश्वस्त करिन अउ कहिन के महाविद्यालयीन छात्र-छात्रा मन के छात्रवृत्ति दर बढ़ाये के घलोक प्रयास करे जाही।

मुख्यमंत्री के संसदीय सलाहकार श्री राजेश तिवारी ह अपन छात्र जीवन के सुरता करत बताइन के नवा कॉलेज भवन बने के पहिली सुविधा मन के कमी रहिस, ओखर बावजूद ओ समय के छात्र-छात्रा मन ह कड़ा मेहनत करके अपन मुकाम ल हासिल करिन अऊ देश अऊ प्रदेश म कई ठन पद ल सुशोभित करत कांकेर जिला के नाम रोशन करिन। मुख्यमंत्री श्री भूपेश बघेल के सोच हे के बस्तर विकास प्राधिकरण के अध्यक्ष अउ उपाध्यक्ष स्थानीय विधायक ही बनय। जल, जंगल अऊ जमीन के अधिकार वनवासी मन ल मिलही, स्थानीय स्तर म कई ठन पद मन के भर्ती होही। उमन छात्रावास दिवस म छात्र-छात्रा मन ल बधाई देवत शिक्षा के प्रति विशेष ध्यान देहे बर प्रोत्साहित करत कहिन के अच्छा पढ़ाई करव अऊ कई ठन क्षेत्र मन म प्रगति करके अपन जिला अउ राज्य के नाम रोशन करव।

कांकेर विधायक श्री शिशुपाल शोरी, अंतागढ़ विधायक श्री अनूप नाग, बीजापुर विधायक श्री विक्रमदेव मण्डावी अउ कोण्डागांव कलेक्टर श्री नीलकंठ टेकाम ह घलोक कार्यक्रम ल संबोधित करिन। ए अवसर म सर्व आदिवासी समाज के अध्यक्ष चंद्रकांत ध्रुवा, सेवानिवृत्त सहायक पुलिस महानिदेशक श्री भारत भूषण ठाकुर, एएसपी पीटीएस माना श्री गोर्वधन सिंह वट्टी, संग छात्र-छात्रा मन बड़ संख्या म उपस्थित रहिन।

लउछरहा..