शिवनाथ ले पानी लाके कुम्हारी जलाशय भरे के प्रस्ताव के होही सर्वेक्षण : श्री भूपेश बघेल

मुख्यमंत्री सामिल होइन मनवा कुर्मी क्षत्रिय समाज के सम्मेलन म
गरूवा अब गरू नइ भलुक ग्रामीण विकास के बनही आधार

रायपुर, मुख्यमंत्री श्री भूपेश बघेल ह आज बलौदाबाजार जिला के ग्राम सकलोर म मनवा कुर्मी क्षत्रिय समाज के सम्मेलन ल सम्बोधित करत कहिन के शिवनाथ नदी के सोमनाथ घाट ले पानी लाके कुम्हारी संग तिर-तखार के जलाशय मन ल भरे के किसान मन कोति ले आए प्रस्ताव के सर्वेक्षण कराये जाही। उमन जिला कलेक्टर ल ए महत्वपूर्ण परियोजना के सर्वेक्षण रिपोट 10 दिन म राज्य सरकार के आघू प्रस्तुत करे के निर्देश दीन। ए प्रस्ताव ले सकलोर संग तिर-तखार के करीबन 43 गांव मन के किसान मन के खेत मन के प्यास बुताही अऊ घेरी-बेरी के अकाल ले अंचल के किसान मन ल मुक्ति मिलही। मुख्यमंत्री ह कहिन कि किसान मन बर पइसा के कमी आड़े नइ आवय।
मुख्यमंत्री ह कहिन कि नरवा, घुरवा, गरूवा अऊ बारी के विकास हमर सरकार के प्राथमिकता हे। एला ध्यान म रखत प्रदेश के गांव मन के समन्वित विकास करे जाही। गांव मन म गाय मन बर पक्का गोठान अऊ दैहान विकसित करे जाही। गरूवा अब गांव अऊ किसान बर गरू (बोझ) नही भलुक ऊंखर आर्थिक विकास के महत्वपूर्ण आधार होही। गोबर ले घर-घर म बायोगैस ले खाना बनही। पशु मन ल उन्नत प्रजाति म बदले जाही ताकि ओ मन किसान मन बर जादा फायदेमंद होवय। उमन मनरेगा योजना ल खेती-किसानी ले जोड़े म जोर दीन। मुख्यमंत्री श्री बघेल ह कहिन कि राज्य सरकार शराबबंदी बर वचनबद्ध हे। फेर एला ऊपर ले थोपे नइ जाए। समाज के बैठक लेके ए म विचार-विमर्श करे जाही। ए बुराई उपर समाज म मंथन होही। उंखर सहमति अऊ बताए गए सुझाव के जइसे एकर क्रियान्वयन करे जाही ताकि ये टिकाऊ बन सकय। सामाजिक अऊ राजनीतिक दुनों तरीका ले हम ए बुराई उपर प्रहार करबोन ताकि हमला पूरा सफलता मिल सकय।
सम्मेलन के अध्यक्षता मनवा कुर्मी क्षत्रिय समाज के प्रदेश अध्यक्ष डॉ. रामकुमार सिरमौर ह करिस। विशेष अतिथि के रूप म राज्यसभा सांसद श्रीमती छाया वर्मा, स्थानीय विधायक श्री प्रमोद कुमार शर्मा, बिलाईगढ़ के विधायक श्री चंद्रदेव राय अऊ मनेन्द्रगढ़ विधायक डॉ. विनय जायसवाल विशेष अतिथि के रूप म उपस्थित रहिन।

लउछरहा..