स्वास्थ्य मंत्री श्री टी.एस. सिंहदेव ह सिम्स के एनआईसीयू वार्ड के लीस जायजा

बिलासपुर, प्रदेश के स्वास्थ्य मंत्री श्री टी.एस. सिंहदेव आज सिम्स अस्पताल बिलासपुर पहुंचिन, जिहां एक दिन पहिली पॉवर पेनल म
आगी लगे के सेती नवजात लइका मन के एनआईसीयू वार्ड म धुगिया भर गए रहिस। श्री सिंहदेव ह एनआईसीयू वार्ड ल पावर पेनल ले
दूरिहा आन जगा म हटाए के निर्देश दीन।
स्वास्थ्य मंत्री ह एनसीयू वार्ड म घटना के समय तैनात नर्स मन ले बातचीत करिन अऊ घटनाक्रम के विस्तृत जानकारी लीन। सिम्स के
डॉक्टर भानू प्रताप सिंह ह ओ मन ल पूरा घटनाक्रम ले अवगत कराइन। उमन बताइन के कन्ट्रोल पेनल म आगी लगे के बाद
एनआईसीयू म धुगिया फइल गीस, संगेच वार्ड के बिजली घलोक गोल हो गीस। नवजात शिशु मन ल उहां ले निकालके 15 मिनट के
भीतरेच स्त्रीरोग विभाग म परिचारिका, चिकित्सक अउ ऑक्सीजन सिलेण्डर संग शिफ्ट कर दे गए रहिस। जिहां ए मन ल ईलाज बर
निजी अस्पताल अऊ जिला चिकित्सालय म भेजे गए रहिस।
श्री सिंहदेव ह अस्पताल के एनआईसीयू वार्ड ल सुविधाजनक जगा म हटाए बर जल्दी कार्यवाही करे के निर्देश दीन। श्री सिंहदेव रेडियो
डायगोनिक विभाग म घलोक गइन अऊ गैस मेनिफोल्ड रूम के जायजा लेके एला घलोक तुरंते अस्पताल के दूसर जगा म हटाए के
निर्देश दीन। श्री सिंहदेव आन निजी अस्पताल मन म घलोक गइन, जिहां सिम्स ले भेजे गये लइका मन के ईलाज होवत हे। उमन
लइका मन के स्वास्थ्य के हालचाल जानिन अऊ परिजन मन ले बातचीत करिन। उमन बताइन के घटना के जांच बर टीम गठित करे
गए हे। जेकर रिपोट आए के बाद दोसी मन उपर कार्यवाही होही। श्री सिंहदेव के संग बिलासपुर विधायक श्री शैलेष पाण्डेय, कलेक्टर डॉ.
संजय अलंग अऊ सिम्स के डीन डॉ. डी.के. पात्रा घलोक उपस्थित रहिन।

लउछरहा..