गरियाबंद ल 58-16 ले हराके कोरबा ह जीतिस खिताब
सुकमा, सुकमा म आयोजित राज्यस्तरीय रात्रिकालीन कबड्डी प्रतियोगिता म सुकरवार के खेले गे फाइनल मुकाबला म कोरबा ह एकतरफा मुकाबला म गरियाबंद ल 58-16 अंक ले हरा के खिताब म कब्जा कर लीस। ये एकतरफा मुकाबला म कोरबा के कप्तान रविन्द्र यादव अऊ राकेश कंवर ह रेड के समय जिहां लगातार अंक हासिल करके सरलग बढ़त देवाइस उन्हे ये टीम के मनोज पटेल ह घलोक अपन पाला म अवइया खिलाड़ी मन ल पकड़े म कोनो कसर नइ छोडि़स। अच्छा तालमेल के संग खेलइया कोरबा के टीम ह गरियाबंद के टीम ल पांच पइत ऑल आउट करके मुकाबला ल पूरा एक तरफा कर दीस।
कोरबा के कप्तान रविन्द्र यादव ल प्रतियोगिता के सर्वश्रेष्ठ खिलाड़ी के खिताब देहे गीस। गरियाबंद के चंद्रबाबू यादव ह बेस्ट रेडर अऊ कोरबा के ही मनोज पटेल ह प्रतियोगिता के सर्वश्रेष्ठ कैचर के खिताब अपन नाम करिस।
