गुजरात के वसावा म दिखिस छत्तीसगढ़ के पंथी के झलक
महाराष्ट्र के लिंगो अऊ मध्यप्रदेश के सैला नृत्य म झूम उठिन देखइया
रायपुर, राजधानी रायपुर के साइंस काॅलेज मैदान म राष्ट्रीय आदिवासी नृत्य महोत्सव म कई राज्य मन के लोक कलाकार मन बिहाव अउ आन संस्कार, पारंपरिक त्यौहार अउ अनुष्ठान, फसल कटाई अउ कृषि अउ आन पारंपरिक विधा मन ऊपर नृत्य प्रस्तुत करिन। आज महोत्सव के पहिली सत्र म बिहनिया नौ बजे ले उत्तर प्रदेश, झारखण्ड, बिहार, गुजरात, महाराष्ट्र, त्रिपुरा, मध्यप्रदेश, तेलंगाना अऊ राजस्थान के आदिवासी नृत्य दल मन ह आकर्षक संगीत मय नृत्य प्रस्तुत करिन। समारोह स्थल म नृत्य दल मन के प्रस्तुत कार्यक्रम म ताली के गुंज सरलग सुनाई देत रहिस।
राष्ट्रीय आदिवासी नृत्य महोत्सव म उत्तर प्रदेश के कलाकार मन ह उहां के पारंपरिक पोशाक म झुमरी तलईया के बोल म आकर्षक लोक नृत्य झांझी प्रस्तुत करिन। ये नृत्य नवा फसल आए के बाद बने फसल होए के खुशी म करे जाथे। जनजाति कलाकार मन ह गरद नृत्य घलोक प्रस्तुत करिन। गरद नृत्य उत्तर प्रदेश म गोंड जन जाति म प्रचलित हे।
ये नृत्य वीरता के चिनहा के रूप म करे गीस। पुरूष कलाकार मन कोति ले महिला मन ल अपन शौर्य के माध्यम ले आकर्षित करे बर करे जाथे।
झारखण्ड के कलाकार मन ह बिहाव के उपलक्ष्य म जउन नृत्य करे जाथे वही डमकच नृत्य प्रस्तुत करिस। बिहार के उरांव जाति के कलाकार मन ह करमा नृत्य प्रस्तुत करिन। करमा नृत्य फसल कटाई के समय करे जाथे। उरांव जाति के मनखे बने फसल अऊ सामाजिक उत्थान बर करमा नृत्य करथें। करमा नृत्य करइया लड़की मन उपास करथें अऊ एक जगा करमा खंबा बनाके सब मिलके नृत्य करथें।
गुजरात के कलाकार मन वसावा नृत्य प्रस्तुत करिन। वसावा होली नृत्य ये, ए नृत्य ल गुजरात के वसावा जाति के मनखे करथे। कलाकार धोती पहिर के पांव म घुंघरू बांधके पूरा रात नृत्य करथें। वसावा नृत्य म छत्तीसगढ़ के पंथी नृत्य के झलक दिखाई देथे। महाराष्ट्र के जनजातीय कलाकार मन विवाह संस्कार ऊपर आधारित लिंगो नृत्य प्रस्तुत करिन। गढ़चिरौली जिला म लिंगो अऊ झिंगो देवी के आराधना बर ये नृत्य करे जाथे। त्रिपुरा के कलाकार मन ह फसल कटाई के समय होवइया ममिता नृत्य प्रस्तुत करिन। मध्यप्रदेश के जनजातीय कलाकार मन ह सैला गेंडी नृत्य प्रस्तुत करिन। जेमा महिला अऊ पुरूष मन ह सैला नृत्य प्रस्तुत करिन। पुरूष मन ह गेंडी नृत्य करिन। तेलंगाना के कलाकार मन ह कृषि आधारित लंबाड़ी नृत्य अऊ राजस्थान के कलाकारों ह आकर्षक गवरी नृत्य प्रस्तुत करिन।
