कोन ये सपना चौधरी जेन ह मचाये हे धमाल?

पाछू इतवार के दिन ले देस के राजनीति म अलगेच नौटंकी चलिस। पहिली खबर उडि़स के हरियाणा के प्रसिद्ध सिंगर अऊ डांसर सपना चौधरी कांग्रेस म सामिल हो गीस। येहू के वोला मथुरा लोकसभा सीट ले हेमा मालिनी के बिरोध म खड़े करे जाही। उत्तर प्रदेश कांग्रेस के सियान राज बब्बर कोति ले पार्टी म ओखर स्वागत करे गीस अऊ कांग्रेस महासचिव प्रियंका गांधी के संग सपना के ट्विटर म एक फोटू तको पोस्ट करे गीस। एकरे बाद सनिच्‍चर रात ले विवाद शुरू हो गीस। राज बब्बर ह ट्वीट करिस के मैं सपना चौधरी जी के कांग्रेस परिवार म स्वागत करत हौं।




दिन भर सोसल मीडिया म ये बात उपर रंग-रंग के गोठ-बात होत रहिस तहां ले सपना चौधरी ह परखर करत बयान दीस के वो कांग्रेस म सामिल नइ होए हे अऊ लोकसभा चुनाव म खड़े तको नइ होवय। सपना ह इतवार के दिन बताइस के फोटू मन जुन्ना रहिस अऊ ये दावा बिलकुल झूठ ये के मैं कांग्रेस पार्टी म सामिल हो गए हौं। प्रियंका गांधी के संग मोर जउन फोटू लगे हे वो जुन्ना आए। मैं उंखर ले कई पइत मिले गए हंव। वो कहिस के मैं कोनो पार्टी म सामिल नइ होए अंव।
हम आप ल बता देवन के रोहतक म जनमे सपना हरियाणा म सबले फेमस मंच कलाकार मन म ले एक हे। वोखर डांस स्टाइल अऊ स्टेज म वोखर परफोर्मेंस के सेती ओ ह हरियाणा के चिन्‍हारी बन गए हे। बताथें के ‘तेरी आंखों के यो काजल’ के डांस के यू ट्यूब वीडियो ह भारत म 25 सबले जादा देखइया वीडियो म सामिल हे। ये गाना ल अब तक कई करोड़ पईत देखे गए हे। इंस्टाग्राम म घलव ओकर कई करोड़ ले जादा फोलोअर्स हें।




एक मध्यमवर्गीय जाट परिवार के सपना ह 2008 म अपन पिता के मृत्यु के बाद डांस करे ल शुरू करिस। वो ह हरियाणा के महिला मन जउन नृत्‍य करथें तेन खोडिया नाम के पारंपरिक नृत्य म माहिर हे। सन् 2015 म ओखर गाना ‘सॉलिड बॉडी रे’ जब वायरल होइस त ओला सबे मन जाने लगिन। 2016 म एक जातिवादी संदर्भ वाले गीत के प्रदर्शन के बाद वो एक बड़का विवाद म फंस गए रहिस। वो समें ओखर खिलाफ जातिगत भावना ल आहत करे बर रिपोर्ट तक दर्ज करे गए रहिस अऊ ओला सोसल मीडिया म बड़ गारी-गिल्‍ला देहे गए रहिस। इही समें इन सबके सपना के मानसिक स्वास्थ्य म भारी असर परिस अऊ ओ हर जहर खाके आत्महत्या के प्रयास तको करिस। बाद म 2016 म ओला कोर्अ ह जमानत दे दीस। बाद म धीरे-धीरे वो ह फेर नाचे-गाए ल सुरू कर दीस। 2017 म वोला बिग बॉस म बलाए गीस तब जम्‍मा देस वोला चिन्‍हे लागिस। वो ह ‘वीरे दे वेडिंग’ अऊ ‘नानू के जानू’ म आइटम सांग तको करे हे।



लउछरहा..