अबूझमाड़ म नवा बिहान, किसान मन ल मिले लगीन उन्कर हक

रइपुर, 22 जून 2021 मंगल। नारायणपुर के अबूझमाड़ी किसान शुरू ले खेती करत आते हे ,फेर गांव के सर्वे नई होए ले उन्कर तीरन पट्टा नई रेहे के सेति न वोमन लैम्पस म धान बेच पावत रिहिने न उन ल शासन के कोनो योजना के लाभ मिलत रिहिने। मुख्यमंत्री दाउ भूपेश बघेल के नेतृत्व म अबूझमाड़ क्षेत्र के गांव मन म राज्य सरकार कोति ले प्राथमिकता ले सर्वे बूत तेजी ले करे जावत हे।
एकर तहत मसाहती पट्टा मिले ले ओरछा विकासखंड के कुरूसनार गांव के किसान श्री सत्यनारायण उसेंडी ह इही बछर पहिली पइत लैम्पस म धान समर्थन मूल्य म बेचीन। ओला धान के बलदा 16 हजार रूपिया ​मिलीस। संगे—संग राजीव गांधी किसान न्याय योजना के पहिली किश्त तको मिलीस ।
उन्कर किसान क्रेडिट कार्ड बनगे। जेन गांव के सर्वे होगे, उहां शासन के योजना ले किसान मन के खेत म भूमि समतलीकरण अउ डबरी निर्माण करे गइस। गांव के फैंसिंग होइस अउ खेत म बोरवेल्स तको लगाए गइस। उद्यानिकी विभाग के योजना म उन्कर खेत म ड्रीप लाईन बिछाए गईन अउ पाली हाउस बनाए गे हे। जेमा वोमन बरबट्टी के खेती करत हवय।
उल्लेखनीय हे कि नारायणपुर जिला के ओरछा अउ नारायणपुर विकासखंड के गांव मन के सर्वेक्षण करे जावत हे, ओरछा विकासखंड के 4 ठिन गांव के पहिलावत सर्वेवक्षण पूरा हो्गे हे, उन ल भुइंया सॉफ्टवेयर ले जोड़ देहे गे हवय, एकर ले अब उहां के 1041 किसान शासन के योजना मन के लाभ ले सकही।