आयुष्मान योजना म निजी अस्पताल मन के मनमानी

रायपुर 24.04.2024 बुधवार। आयुष्मान योजना म निजी अस्पताल प्रबंधन अपन मनमानी करत हावय। स्वास्थ्य विभाग कोति ले आयुष्मान भारत, प्रधानमंत्री जन आरोग्य योजना के तहत तीन बछर म मिले शिकायत मन के जानकारी मांगे गइस। राज्य नोडल एजेंसी कोति ले बछर 2021-22, 2022-23 अउ 2023-24 म आयुष्मान योजना के कतेक अकन शिकायत मिले हावय। येमा राज्य नोडल एजेंसी कोति ले 995 ठिन शिकायत के जानकारी देहे गइस। जेमे 26 ठिन म निलंबन, 25 ठिन म जुर्माना अउ पाँच बछर बर पंजीयन निरस्त करे गे हावय। कुल 45 ठिन अस्पताल मन ऊपर कार्यवाही करे गे हावय।
विभाग ल ये शिकायत मन टोल फ्री अउ आने माध्यम ले मिले रिहिसे। आयुष्मान योजना के तहत गरीबी रेखा म अवइया लोगन मन के पाँच लाख तक फोकट म इलाज करे जाथे। सामान्य मनखे मन बर 50 हजार तक फोकटइहा इलाज के बेवस्था हावय, फेर आयुष्मान कार्ड ले इलाज करे के बेरा मरीज ले एक्को रूपिया नइ लेना हे।
अधिकतर अस्पताल प्रबंधन आयुष्मान ले इलाज करे के बावजूद मरीज मन ले तको बिल के पइसा वसूल लेथे, जेन ह नियम के विपरीत हावय। ये योजना ले इलाज करवइया मरीज के कतकोन अकन पइसा खरचा होवय फेर मरीज मन ले लेहे के प्रावधान नइहे। नियम के खिलाफ जाके प्रबंधन मन ह पइसा लेवत हावयं। शिकायत होए के बावजूद स्वास्थ्य विभाग कोति ले अस्पताल मन ऊपर कोनो उचित कार्यवाही नइ होवत हे वोकरे सेति प्रबंधन मन बिना कोनो डर हियाव के मरीजमन के स्वजनमन ले मोटहा रकम लेके मोटावत हावयं।