रायपुर. 19 जनवरी 2024। उप मुख्यमंत्री श्री अरुण साव ह आज बिलासपुर म अपन निवास कार्यालय म आयोजित ‘जनदर्शन’ म बड़ संख्या म दूर-दराज ले पहुंचे मनखे मन के समस्या सुनिन। उमन इत्मीनान ले एक-एक कर के मनखे मन के समस्या सुनके ऊंखर सार्थक निराकरण के निर्देश अधिकारी मन ल दीन। उमन ‘जनदर्शन’ म मुलाकात करे आए मनखे मन ले अयोध्या म रामलला प्राण प्रतिष्ठा समारोह के अवसर म 22 जनवरी के अपन घर म दीप जलाके उत्सव मनाए के आव्हान करे गीस। ‘जनदर्शन’ म मनखे मन ह अपन समस्या अऊ मांग ले संबंधित 200 ले जादा आवेदन उप मुख्यमंत्री ल दीन।
उप मुख्यमंत्री श्री अरुण साव ल ‘जनदर्शन’ म जांजगीर जिला के बुढ़ादेव आदिवासी समाज सेवा समिति के रूप म संगठित सबरिया जाति के मनखे मन ह गोंड़ जाति के मान्यता देवाए संबंधी आवेदन दीन। श्री साव ल समिति के सदस्य मन ह बताइन कि सब्बल लेके मेहनत-मजदूरी करे के सेी बोल-चाल के भाखा म मनखे ओ मन ल सबरिया कहे लगिन। कालांतर म इही नाम राजस्व अभिलेख म घलोक दर्ज हो गे जेखर सेती ओ मन ल गोंड़ जाति नइ माने जात हे। ते पाए के ओ मन ल आरक्षण के लाभ नइ मिल पात हे जबकि ओ मन गोंड़ ही यें अऊ बहुत पिछड़ा अउ आर्थिक रूप ले कमजेार हें। उप मुख्यमंत्री ह उंखर मांग म गंभीरतापूर्वक विचार करे के आश्वासन दीन। अंतरराष्ट्रीय कत्थक नृत्यांगना श्रीमती वासंती वैष्णव ह ‘जनदर्शन’ म कलाकार मन बर बिलासपुर म रियायती दर म सभागार उपलब्ध कराए के मांग करिन जेखर से कई ठन विधा के कलाकार मन ल प्रतिभा देखाय बर मंच मिल सकय।
उप मुख्यमंत्री श्री साव ल ‘जनदर्शन’ म मस्तूरी विकासखंड के कई गांव मन के किसान मन ह ग्राम पंचायत पचपेड़ी म जिला सहकारी केन्द्रीय बैंक के शाखा खोले बर ज्ञापन सौंपिन। मुंगेली जिला के सुरीघाट निवासी श्री सत्यप्रकाश गेंदले ह अनुकंपा नियुक्ति म देरी के शिकायत उप मुख्यमंत्री ले करत बताइस कि पिता के मृत्यु के बाद डेढ़ साल के समय बीते के बाद घलोक अनुकंपा नियुक्ति नइ दे गए हे। श्री साव ह ऊंखर आवेदन म विचार करके उचित कार्यवाही के आश्वासन दीन।
‘जनदर्शन’ म उप मुख्यमंत्री श्री साव ले सौजन्य भेंट करे अउ कई ठन कार्यक्रम अउ आयोजन मन म आमंत्रण बर घलोक बिलासपुर अऊ मुंगेली संग कई जिला के मनखे पहुंचे रहिन। ओ मन ल अखंड ब्राम्हण सेवा समिति ह बिलासपुर के सीएमडी कॉलेज मैदान म होवइया छत्तीसगढ़ी व्यंजन मेला म सामिल होए के आमंत्रण दीन। उप मुख्यमंत्री ल मुंगेली जिला के मनखे मन ह गायत्री परिवार के 108 कुण्डीय राष्ट्र जागरण अभियान महायज्ञ अऊ बलौदाबाजार जिला के मनखे मन ह कर्मा जयंती समारोह म सामिल होए बर आमंत्रित करिन। श्री साव ह सबो ल आमंत्रण बर धन्यवाद देवत ऊंखर कार्यक्रम के सफलता खातिर शुभकामना दीन।