सीएम हाउस म होवत हे आयोजन के जोरदार तैयारी
पाटन के करसा गांव जाकर मुख्यमंत्री श्री बघेल करही गोमूत्र खरीदी के शुरुआत
किसान सम्मेलन का होही आयोजन, मुख्यमंत्री करही किसान मन ले चर्चा
नवा कृषि उपकरण का होही लांचिंग
रायपुर, हरेली तिहार के छत्तीसगढ़ म विशेष महत्व हे। हरेली छत्तीसगढ़ी संस्कृति, कृषि संस्कृति, परम्परा, लोक परब अउ पर्यावरण के महत्ता ल दर्शाथे। मुख्यमंत्री श्री भूपेश बघेल के राजधानी रायपुर निवास म पउर साल जइसे एसो घलोक किसान, बहिनि अउ भाइ मन के संग हरेली के परब पारंपरिक स्वरूप म धूमधाम ले मनाए जाही। मुख्यमंत्री श्री बघेल ये बेरा म कृषि यंत्र मन के पूजा घलोक करहीं। हरेली परब ल धूमधाम ले मनाए बर मुख्यमंत्री निवास म तैयारी जोर-शोर ले शुरू हो गए हे। ये बेरा म छत्तीसगढ़ी लोक कलाकार मन सुआ, कर्मा, ददरिया अऊ गेड़ी नृत्य के प्रस्तुति देहीं अऊ हरेली गीत घलोक गाए जाही। छत्तीसगढ़ राज्य म मुख्यमंत्री श्री भूपेश बघेल ह जेन सार्वजनिक अवकाश मन के घोषणा करे हें, ओमां हरेली तिहार घलोक सामिल हे।
मुख्यमंत्री बईला गाड़ी म पहुंचहीं पूजास्थल
मुख्यमंत्री हरेली पूजास्थल म बईला गाड़ी म चढ़ के आहीं। उहां ओ मन गौमाता के पूजा करहीं। संगेच परंपरागत रूप ले कृषि उपकरण मन के पूजा करहीं। ओ मन मशीन ले पैरा काटहीं अऊ गाय मन ल खवाहीं। हरेली के मौका म गोवंश के पूजा होथे। जानबा हे कि पउर साल घलोक मुख्यमंत्री ह अपन निवास ले बईला गाड़ी ले निकले रहिन अऊ सुंदर परंपरागत तरीका ले हरेली के उत्सव मनाए रहिन।
4 रूपिया लीटर म गोमूत्र खरीदी के होही शुभारंभ
हरेली के पावन अवसर म मुख्यमंत्री श्री भूपेश बघेल पाटन ब्लॉक के करसा गांव ले गोधन न्याय योजना के विस्तार करत गोमूत्र खरीदी के शुभारंभ करहीं। गांव के पशुपालक 4 रुपिया प्रति लीटर म गोमूत्र बेंच सकहीं। हरेली के मौका म होवइया ये खरीदी ले प्रदेश के गौवंशपालक आर्थिक रूप ले सशक्त बनहीं। अब तक किसान गोबर बेंचत रहिन अब गोमूत्र घलोक बेचे ले उंखर आय म इजाफा होए ले पशुधन विकास के काम ल बढ़ावा मिलही। विशेषज्ञ मानथें कि कृषि के संग पशुपालन के काम करे ले किसान अपन आय दुगुनी करे के लक्ष्य हासिल कर सकत हें। ये मौका म करसा म कृषि सम्मेलन के आयोजन घलोक करे जात हे। इहां नवा कृषि उपकरण मन के लांचिंग होही। खेती किसानी बर उपयोगी कृषि प्रदर्शनी घलोक लगाए जाही। मुख्यमंत्री किसान मन ले खेती किसानी ऊपर चर्चा करहीं अऊ उंखर सम्मान घलोक करहीं। 20 जुलाई 2020 के मुख्यमंत्री श्री भूपेश बघेल ह हरेली परब के अवसर म ही देश के गजब गोधन न्याय योजना के शुरूआत करे रहिन।
नवा कृषि उपकरण मन के होही लांचिंग
किसान सम्मेलन के खास आकर्षण नवा कृषि उपकरण मन के लांचिंग होही। ये मां सबले खास हे एक अइसन ड्रोन जेखर माध्यम ले फर्टिलाइजर अऊ कीटनाशक के समुचित मात्रा म काफी कम समय म छिड़काव हो सकही। एखर संगगेच कृषि बर उपयोगी अत्याधुनिक उपकरण घलोक डिस्प्ले बर लगाए जाही। कृषि सम्मेलन म विशेषज्ञ घलोक मौजूद रइही जेकर से किसान आधुनिक तरीका ले खेती के संबंध म अऊ खेती म आए नवा तकनीक के बारे म जानकारी ले सकहीं।
छत्तीसगढ़ी पारंपरिक खेल मन के होही धूम
हरेली खेती के तिहार ये अऊ संगेच छत्तीसगढ़ म खेल मन के सबले बड़का दिन। ये मौका म छोटे लइका मन तो गेड़ी चढ़थेँच, बड़े बुजुर्ग घलोक गेड़ी चढ़थें। ये दिन करसा म गेड़ी प्रतियोगिता घलोक होही अऊ एखर विजेता मन ल सम्मानित घलोक करे जाही। ये मौका म गेड़ी रेस, भौंरा, पिट्ठूल, कंचा, पतंग, गोली चम्मच, खोखो, रस्सा खींच, तिग्गा गोटी अऊ गिल्ली डंडा जइसे खेल मन के आयोजन घलोक करे जाही। प्रदेश के सबो स्कूल मन म घलोक गेड़ी प्रतियोगिता के आयोजन करे जाही।
खेती किसानी ऊपर होही चर्चा
हरेली के तिहार बने फसल के कामना बर सबले खास तिहार ये। ये उत्सव के समय घलोक ये अऊ बेहतर खरीफ फसल बर विचारविमर्श कर योजना बनाए के घलोक। मुख्यमंत्री कृषक सम्मेलन म किसान मन ले बातचीत करहीं। मुख्यमंत्री खुद किसान घलोक ये ते पाए के अपन अनुभव घलोक साझा करहीं। संगेच सरकार कोति ले किसान मन के हित म सुरू करे गए योजना मन के जानकारी घलोक देहीं। ओ मन किसान मन के अनुभव घलोक जानहीं अऊ उंखर से चर्चा घलोक करहीं।
होगी गोमूत्र खरीदी
छत्तीसगढ़ सरकार ह जैविक खेती कोती राज्य ल ले जाय के दिशा म सरलग काम करत हे। ते पाए के जरूरी हे कि गोवंश संवर्धन होवय अऊ इंकर पालन किसान मन बर उपयोगी होवय। गोबर खरीदी के माध्यम ले अऊ एखर ले वर्मी कंपोस्ट बनाके जैविक खाद के बड़का पैमाना म उत्पादन प्रदेश म होवत हे। अब गोमूत्र खरीदी ले किसान मन बर अकतहा आय के जरिया तियार होही। एखर से ओ मन पशुपालन के दिशा म अऊ तेजी ले आगू बढ़ही अऊ उंखर आय के स्तर म बढ़ोत्तरी होही।