कैंसर पीड़िता श्रीमती आम्रपाली ह हारमोनियम म जीतिस इनाम: युवा महोत्सव आयोजन बर राज्य सरकार के जताइन आभार

रायपुर, बलौदाबाजार-भाटापारा जिला के हिरमी निवासी अऊ पेशा ले शिक्षक श्रीमती आम्रपाली बनर्जी कैंसर पीड़ित होए के बाद घलव हिम्मत नइ हारे येँ अऊ राजधानी रायपुर के साइंस कॉलेज मैदान म आयोजित राज्य स्तरीय युवा महोत्सव म हारमोनियम प्रतियोगिता म तीसर पुरस्कार पाए हें। श्रीमती बनर्जी ह प्रदेश म युवा महोत्सव के अयोजन बर राज्य सरकार के प्रति आभार व्यक्त करत कहिन कि प्रतियोगिता बर उमर मायने नइ रखय। उमन 40 साल आयु वर्ग के हारमोनियम प्रतियोगिता म भाग लीन अऊ जितिन। श्रीमती आम्रपाली ह बताइस कि कैंसर के संगे-संग ओ मन ल कमर म घलोक बिकट तकलीफ हे। हारमोनियम रियाज बर बने सहिन बईठ नइ पावयं। ओखर बावजूद श्रीमती आम्रपाली ह हिम्मत नइ हारीन। उमन युवा महोत्सव के ए आयोजन म हिस्सा लीन। हारमोनिययम प्रतियोगिता म उमन तीनों सप्तक म छोटे-छोटे तीन टुकड़ा प्रस्तुत करिन। उंखर रचना ल जज मन ह सहराइन अऊ ओ मन पुरस्कार घलोक जीतीन। श्रीमती आम्रपाली बनर्जी ह मुख्यमंत्री श्री भूपेश बघेल ल युवा मन के प्रतिभा ल निखारने ओ मन ल मंच प्रदान करे बर आयोजित युवा महोत्सव बर धन्यवाद दीन। उमन कहिन कि अइसन आयोजन  ले युवा मन ल अपन हुनर ल प्रदर्शित करे के अवसर मिलथे। उंहे प्रतियोगिता म हिस्सा लेहे ले आगू बढ़े बर आत्मविश्वास पैदा होथे। अइसन आयोजन होत रहना चाही।