रायपुर, 21 जनवरी 2024। अयोध्या म श्री रामलला प्राण प्रतिष्ठा के पावन अवसर म चंदखुरी स्थित कौशल्या धाम म 22 जनवरी के संझा रामोत्सव के भव्य आयोजन होही। संस्कृति अऊ पर्यटन मंत्री श्री बृजमोहन अग्रवाल के मुख्य आतिथ्य अऊ सांसद श्री सुनील सोनी के अध्यक्षता म आयोजित ए कार्यक्रम म छत्तीसगढ़ के लोक कलाकार मानस गायन अऊ भक्तिमय सांस्कृतिक कार्यक्रम के प्रस्तुति देंहीं।
छत्तीसगढ़ शासन के पर्यटन विभाग कोति आयोजित होवइया भव्य रामोत्सव के आयोजन माता कौशल्या धाम परिसर म संझा 5.30 बजे ले चालू होही। ए मौका म विशेष डाक टिकिट विमोचन करे जाही। छत्तीसगढ़ के प्रसिद्ध लोक कलाकार श्री राकेश तिवारी अउ साथी मन कोति ले राम वन गमन नृत्य नाटिका के प्रस्तुति कार्यक्रम म देंहीं। एखर अलावा श्रीमती गोपा सान्याल अउ साथी राम भजन, श्रीमती अल्का चंद्राकर अउ साथी भजन, जसगीत अउ लोकगीत के संगेच बहुत अकन मानस मंडली मन मानस गायन प्रस्तुत करहीं।