- मुख्यमंत्री ह के खेल गतिविधि मन के करिन समीक्षा
- स्पोर्ट्स स्कूल अऊ खेल अकादमी चालू करे बर योजना बनाए के निर्देश
- ग्राम पंचायत स्तर म युवा मन ल खेल मन अऊ सांस्कृतिक गतिविधि मन ले जोड़े जाही
रायपुर, छत्तीसगढ़ म राष्ट्रीय अऊ अंतर्राष्ट्रीय स्तर के खेल गतिविधि मन के आयोजन अऊ खेल गतिविधि मन के समन्वय बर खेल विकास प्राधिकरण के गठन करे जाही। मुख्यमंत्री श्री भूपेश बघेल ह आज इहां मंत्रालय म आयोजित खेल विभाग के समीक्षा बैठक म खेल विकास प्राधिकरण के गठन बर प्रस्ताव तियार करे के निर्देश दिए हें। खेल विकास प्राधिकरण के माध्यम ले प्रदेश म खेल मन के विकास बर नीतिगत निर्णय लेहे जाही।
मुख्यमंत्री ह बैठक म कहिन कि प्रदेश म खेल गतिविधि मन बढ़ाए के उदीम करे जाना चाही, जेखर से प्रदेश म बने खेल अधोसंरचना के सबले जादा उपयोग सुनिश्चित हो सकय। बैठक म खेल मंत्री श्री उमेश पटेल, मुख्य सचिव श्री सुनील कुजूर, मुख्यमंत्री के प्रमुख सचिव श्री गौरव द्विवेदी, खेल विभाग के सचिव श्री सिद्धार्थ कोमल सिंह परदेशी अऊ खेल संचालक श्रीमती श्वेता सिन्हा घलोक उपस्थित रहिन।
प्रदेश म कई जगा मन म खेल अकादमी चालू करे ले संबंधित विषय मन उपर बैठक म विचार-विमर्श करे गीस। मुख्यमंत्री ह कहिन कि प्रदेश के खिलाड़ी मन ल अंतर्राष्ट्रीय स्तर म पदक जीते बर तियार करे के उदीम करे जाना चाही। उमन राज्य म स्पोर्ट्स स्कूल चालू करे, ग्राम पंचायत स्तर म युवा मन ल खेल अऊ सांस्कृतिक गतिविधि मन ले जोड़े अऊ खेल अधोसंरचना के उपयोग बर योजना तियार करे के निर्देश दीन।