गरियाबंद: रामलला दर्शन योजना अंतर्गत जिला के 90 श्रद्धालु अयोध्या बर होइन रवाना

गरियाबंद, 06 मार्च 2024। मुख्यमंत्री श्री विष्णु देव साय ह आज राजधानी रायपुर के रेल्वे स्टेशन ले रामलला दर्शन योजना के तहत स्पेशल ट्रेन ल हरी झंडी देखा के रवाना करिन। ए आस्था ट्रेन ले छतीसगढ़ के लगभग 850 राम भक्त अयोध्या म राम लला के दर्शन बर रवाना होइन। ये मां गरियाबंद जिला ले 90 श्रद्धालु घलोक सामिल हे। एखर ले पहिली आज भिनसरहा राजिम विधायक श्री रोहित साहू ह फिंगेश्‍वर ले जिला के श्रद्धालु मन ल शुभकामना के संग रायपुर बर रवाना करे रहिन। रायपुर ले अयोध्या बर श्रीराम लला के दर्षन करे श्रद्धालुगण बहुत उत्साहित नजर आइन। जिला के देवभोग निवासी 60 वर्षीय श्री लालधर यादव, श्री तुलसी राम यादव, श्री सुनाधर यादव, श्री मकरन नायक अऊ 60 वर्षीय श्री चाम्पर नेताम ह बताइस कि प्रभु श्री राम के अयोध्या धाम म प्राण प्रतिष्ठा होए के बाद पहली पइत दर्शन करे जावत हें जेकर से मन म एक अलग खुशी महसूस होवत हे।
अयोध्या जाय बर रवाना होए 60 बछर के श्रीमती फूलकुंवर ह खुशी जाहिर करत कहिन कि मुख्यमंत्री श्री विष्णु देव साय के सार्थक पहल ले प्रभु श्रीरामलला के दर्शन करे के सौभाग्य मिले हे। प्रशासन ह गरियाबंद जिला ले रायपुर स्टेशन तक लाय बर वाहन के सुविधा देहे गए रहिस। हमार गांव ले अऊ साथी मन घलोक बड़ संख्या म प्रभु श्रीराम के दर्शन करे एक संग ट्रेन म जावत हें। गांव हरदीभाठा के 70 बछर के श्रीमती सोनबाई अऊ श्रीमती उषा बाई पटेल ह मुख्यमंत्री श्री विष्णु देव साय के प्रति आभार जताइन। उमन कहिन कि छत्तीसगढ़ शासन ह श्रद्धालु मन बर अच्छा व्यवस्था, साफ सुथरा ट्रेन, नाश्ता भोजन के घलोक उत्तम व्यस्था करे हे। श्रद्धालु मन ह बताइन कि छत्तीसगढ़ शासन ह श्री रामलला दर्शन योजना के शुरूआत करे हे। ये योजना आर्थिक रूप ले कमजोर परिवार बर बहुतेच लाभदायक हे। उम्र के ए पड़ाव म तीर्थ यात्रा करे के मन सबो के रहिथे। फेर आर्थिक स्थिति ठीक नइ होए के सेती यात्रा नइ कर पावयं। अइसन परिवार के बुजुर्गों ल ए योजना के प्रत्यक्ष लाभ मिलत हे।