मोपका कॉलेज के नाम स्व. रामनाथ वर्मा अउ ग्राम तिल्दाबांधा म पेयजल बर अकतहा व्यवस्था के घोषणा
मुख्यमंत्री सामिल होइन बलौदाबाजार म आयोजित मनवा कुर्मी क्षत्रिय समाज के सम्मेलन म
रायपुर, मुख्यमंत्री श्री भूपेश बघेल ह कहिन हे कि ग्रामीण अर्थव्यवस्था ल मजबूती देहे म गौठान मन के महत्वपूर्ण भूमिका हे। उमन कहिन कि गौठान मन ल ग्रामीण आजीविका के केन्द्र के रूप म विकसित करे जात हे। छत्तीसगढ़ के कृषि प्रधान अर्थव्यवस्था के मुताबिक राज्य के अन्नदाता मन के आर्थिक स्थिति ल मजबूत करे खातिर कई ठन योजना क्रियान्वित करे जात हे। श्री बघेल काली बलौदाबाजार-भाटापारा के जिला मुख्यालय म आयोजित बलौदाबाजार राज कुर्मी क्षत्रिय समाज के अधिवेशन ल सम्बोधित करत रहिन। उमन ये मौका म मोपका कॉलेज के नामकरण स्वर्गीय रामनाथ वर्मा के नाम म करे अऊ ग्राम तिल्दाबांधा म पेयजल बर अकतहा व्यवस्था के घोषणा करिन। कार्यक्रम म उमन 23 प्रतिभाशाली पढ़ईया लईका मन ल समाज कोती ले सम्मानित घलोक करिन। ये दौरान उमन पुष्पा वर्मा के लिखे चित्रोत्पला प्रेमदीप पुस्तक के विमोचन घलोक करिन।
मुख्यमंत्री श्री बघेल ह अधिवेशन ल सम्बोधित करत कहिन कि कुर्मी समाज प्रगतिशील समाज हे। समाज म व्याप्त कई ठन विसंगति मन ल दूर करे बर सार्थक कदम उठाए जात हे। कोनो समाज म बदलाव बर शिक्षा बहुत जरूरी हे। लइका मन ल अंगरेजी माध्यम म शिक्षा प्रदान करे म राज्य म स्वामी आत्मानंद उत्कृष्ट अंगरेजी माध्यम स्कूल खोले गए हे। हमला केवल सरकारी नौकरी म ध्यान नइ देना हे, व्यवसाय कोती मनखे मन ल बढ़ाना हे। उमन कहिन कि उंखर सरकार छत्तीसगढ़िया के अस्मिता ल जगाए अउ छत्तीसगढी संस्कृति ल बचाय खातिर लगातार काम करत हे। स्थानीय तीज तिहार अऊ खान-पान ल बढ़ावा देहे जात हे, जेखर से मनखे मन म गर्व के अनुभूति होय।
मुख्यमंत्री ह कहिन कि छत्तीसगढ़ म नवा सरकार के गठन के बाद धान खरीदी के मात्रा अऊ किसान मन के संख्या म सरलग बढ़ोतरी होवत हे। अभी हाल म खेती के रकबा म बढ़ोतरी होय हे अऊ एखर प्रति मनखे मन के रुझान बाढ़े हे। राज्य म गोधन योजना ले रोजगार अऊ आय के नवा स्रोत चालू होए हे। जेखर पास पहिली कोनो रोजगार नइ होत रहिस। ओ मन घलोक गोबर बेचके लाभ कमावत हे। श्री बघेल ह कहिन कि गांव के परंपरा ल पुनर्जीवित करे के काम सरकार कोति ले करे जात हे। योजना मन ल चलाय बर सबो के भागीदारी जरूरी हे। उमन कहिन कि सबो गौठान मन म रूरल इंडस्ट्रियल पार्क बनाय जाही। गांधी जी के सपना ल साकार करे के दिशा म सरकार निरंतर काम करत हे। उमन कहिन कि गौठान ल हम केवल गाय-बईला ल सकेल के रखे के ठउर बस नही भलुक एला ग्रामीण आजीविका के महत्वपूर्ण केन्द्र के रूप म विकसित करत हन। स्थानीय महिला मन वर्मी कम्पोस्ट के संग धूप, अगरबत्ती संग स्थानीय जरूरत के तमाम चीज तियार करत हे। खाली पड़े जमीन म साग-सब्जी उपजा के अकतहा आमदनी घलोक अर्जित करत हे। सम्मेलन के अध्यक्षता कुर्मी समाज के केन्द्रीय अध्यक्ष चोवाराम वर्मा ह करिन। उमन सम्मलेन ल सम्बोधित करत होइन कहिन कि ग्राम स्वराज के गांधी जी के सपना ल मुख्यमंत्री श्री बघेल आगू बढ़ावत हे।
ये बेरा म नगरीय प्रशासन मंत्री डॉ. शिव कुमार डहरिया, राज्यसभा सांसद श्रीमती छाया वर्मा, संसदीय सचिव अउर विधायक चंद्रदेव राय, शकुन्तला साहू, जिला पंचायत अध्यक्ष श्री राकेश वर्मा, पाठ्य पुस्तक निगम अध्यक्ष शैलेष नितिन त्रिवेदी, छत्तीसगढ़ राज्य खनिज विकास निगम के अध्यक्ष श्री गिरिश देवांगन, पूर्व विधायक श्री जनकराम वर्मा संग बड़ी संख्या म ग्रामीण अऊ कुर्मी समाज के राजप्रधान अऊ पदाधिकारी व सामाजिक कार्यकर्ता मौजूद रहिन।