मुंगेली, कलेक्टर श्री अजीत वसंत ह आज दौरा के बेरा म विकासखण्ड लोरमी के ग्राम चेचानडीह पहुंचि अऊ उहां गांव वाले मन ले मुलाकात करिन। ये बेरा म उमन गांव वाले मन ले खाद्यान्न के उपलब्धता, पेयजल, विद्युत, सड़क आदि के बारे म जानकारी लीन। ये बेरा म ग्राम के किसान सुकरवार सिंह बैगा ह पेयजल बर हेण्डपम्प अऊ विद्युत पोल के मांग करिस। वोकर बताती वोखर घर मेर हेण्डपम्प अऊ विद्युत पोल नइ हे। जेखर सेती ओ मन ल बहुत समस्या के सामना करना परत हे। कलेक्टर श्री वसंत ह वोखर समस्या ल गंभीरता ले लीन अऊ सुकरवार सिंह बैगा ल स्वच्छ पेयजल उपलब्ध कराए बर वोखर घर के तीरेच हेण्डपम्प स्थापित करे अऊ ओ मन ल विद्युत उपलब्ध कराए बर वोखर घर तक विद्युत पोल लगाय बर संबंधित अधिकारी मन ल निर्देश दीन। ये बेरा म लोरमी अनुविभाग के अनुविभागीय अधिकारी श्रीमती मेनका प्रधान घलोक मौजूद रहिन।
चेचानडीह गांव के सुकरवार सिंह बैगा के घर के तीर लगही हेण्डपम्प अऊ वोखर घर तक आही बिजली के खम्बा
