छत्तीसगढ़ के योजना देश भर बर हे मॉडल – मुख्यमंत्री दाऊ भूपेश बघेल
मुख्यमंत्री ह टीवी-9 डिजिटल छत्तीसगढ़ चैनल के करीन शुभारंभ
रइपुर, 16 जुलाई 2022
मुख्यमंत्री दाऊ भूपेश बघेल ह कहीन कि छत्तीसगढ़ मॉडल के गूंज आज पूरा देश म हावय। छत्तीसगढ़ के योजना पूरा देश बर मॉडल बनत हे। झारखंड सरकार ह छत्तीसगढ़ के गोधन न्याय योजना ल जस के तस अपना ले हे। उत्तर प्रदेश अउ राजस्थान सरकार तको छत्तीसगढ़ के देखासीखी गोबर खरीदी ऊपर विचार करत हे। आज छत्तीसगढ़ के किसान मन ल देश म सबले जादा धान के कीमत मिलत हावय। छत्तीसगढ़ के अन्नदाता किसान खुशहाल हवय। मुख्यमंत्री ह आज राजधानी रइपुर के एक ठो निजी होटल म आयोजित कार्यक्रम म टीवी-9 डिजिटल छत्तीसगढ़ चैनल के शुभारंभ करत अइसन आसरा के विचार व्यक्त करीन।
मुख्यमंत्री ह कहीन कि छत्तीसगढ़ म गौ-माता के सेवा के संगे-संग गौ-पालन अउ पशुपालन ल अर्थबेवस्था ले जोड़े गे हवय। किसान हितैषी नीति मन ले छत्तीसगढ़ म खेती-किसानी लाभ के बेवसाय हरे। छत्तीसगढ़ म गोधन न्याय योजना के प्रारंभ होए के बाद पशुपालन ल बढ़ावा मिले हे। डेयरी के संख्या म बढ़ौतरी होए हे। गोधन न्याय योजना के तहत पाछु 2 बछर म 150 करोड़ रुपिया के गोबर पशुपालक, ग्रामीण, किसान मन ले बिसाए गे हे। बिसाए गे गोबर ले गौठान म स्व सहायता समूह के माइलोगन मन वर्मी कंपोस्ट बनावत हें। 40 प्रतिशत भूमिहीन लोगन मन गोबर बेचत हे अउ आर्थिक लाभ कमावत हे।
मुख्यमंत्री ह छत्तीसगढ़ सरकार के बूता मन ऊपर प्रकाश डालत कहीन कि मुख्यमंत्री पद के शपथ लेहे के पीछु हमन सबले पहिली किसान मन के करजा माफी, 2500 रूपिया प्रति क्विंटल म धान बिसई (खरीदी) अउ आदिवासी मन के जमीन वापसी के निर्णय लेन। कोरोना संकट के बेरा आने राज्य मन ले छत्तीसगढ़ आए लोगन मन के ठहरे, जेवन के बेवस्था करे गीस। वन क्षेत्र म लघु वनोपज के सकेला (संग्रहण) के बूता करे गीस। समाज के सबो वर्ग ले गोठ बात करके उन्कर दिक्कत ल दुरिहाए के उदीम करे गीस।
स्वास्थ्य सेवा मन के ढांचा ल पोठ करे के संग लोगन के इलाज, ऑक्सीजन के बेवस्था करे गीस। राजीव गांधी किसान न्याय योजना के तहत किसान मन ल इनपुट सब्सिडी के भुगतान करे गीस। कोविड गाइडलाईन के पालन करत मनरेगा के बूता प्रारंभ करे गीस। लॉकडाउन खुले के पीछु सबले पहिली छत्तीसगढ़ म उद्योग प्रारंभ होइस। राज्य सरकार के योजना मन ले अधिकांश लोगन के थैली म पैसा पहुंचीस। लोगन तीर पइसा गीस त बयपार तको चले लगीस, बयपार के चले ले उद्योग तको चले लगीस जेकर ले छत्तीसगढ़ म मंदी के असर नइ रिहिस।
मुख्यमंत्री कहीन कि विकास कार्य म हम कोनो भी सरकार ले पीछु नइ रेहेन। सड़क मन के मामला म हमन 16 हजार करोड़ रूपिया लागत के सड़क बनाएन। मिलेट मिशन के उल्लेख करत मुख्यमंत्री ह कहीन कि छत्तीसगढ़ अकेल्ला राज्य हरे जिहां 3100 रुपिया क्विंटल म कोदो-कुटकी अउ रागी 3300 रुपिया क्विंटल म खरीदी होवत हावय। उन कहीन कि हमर कोशिश इही हे कि जिहां जउन फसल बर मौसम अनुकूल हे उहां उही फसल ल बढ़ावा दे जाय।
मुख्यमंत्री कहीन कि राज्य सरकार महात्मा गांधी जी के रद्दा म चलत हे। गांधी जी के रद्दा ग्राम स्वराज के रद्दा हरे। छत्तीसगढ़ के गौठान म रूरल इंडस्ट्रीयल पार्क के अंतर्गत तेल मिल, दाल मिल, मिनी राइस मिल स्थापित करे गे हे। जेकर ले हमर स्व-सहायता के बहिनी मन आर्थिक रूप ले पोठ होवत हे। उन मन कहीन कि हमार राम गरीब के राम, शबरी के राम, गांधी के राम हरे। दुनिया म माता कौशल्या के एकलऊता मंदिर छत्तीसगढ़ के चंदखुरी म हवय, जेकर राम वनगमन परिपथ के अंतर्गत सबले पहिली सौंदर्यीकरण करे गे हे।
छत्तीसगढ़ पहला राज्य हरे जोन चिटफंड कंपनी मन म निवेश करइया आम लोगन के पइसा लहुटावत हे। अब तक 40 करोड़ रुपिया राशि हमन निवेशक मन लहुटाए हन। राज्य सरकार ह किसान, आदिवासी, मजदूर, माइलोगन, युवा संग सबो वर्ग के हित म बूता करे हे। इही बेरा म टीवी-9 डिजिटल के सलाहकार संपादक श्री अमिताभ अग्निहोत्री, संपादक श्री राहुल अग्निहोत्री, समूह संपादक श्री दीप उपाध्याय, सीजीओ टीवी-9 श्री रक्तिम दास, एग्जीक्यूटिव एडिटर श्री दिनेश गौतम अउ एग्जीक्यूटिव एडिटर श्री कार्तिकेय शर्मा संघरे रिहिन।