रइपुर, 14 जून 2021 सम्मार। मुख्यमंत्री दाउ भूपेश बघेल ह कहीन कि प्रदेश म एडवेंचर स्पोर्ट्स ल बढ़ावा देहे बर छत्तीसगढ़ म लउहे पर्वतारोहण अकादमी प्रारंभ करे जाही । ये अकादमी बस्तर म शुरू होही । मुख्यमंत्री दाउ बघेल ह आज इहां घरू कार्यालय म छत्तीसगढ़ के युवा पर्वतारोही नैना सिंह धाकड़ ले भेंट करके ये घोषणा करीन। नैना सिंह ल एक जून के दुनिया के सबले ऊंच चोटी माऊंट एवरेस्ट जीेते म सफलता मिलीस हे। मुख्यमंत्री ह ये शानदार उपलब्धि बर नैना सिंह ल बधई उन्कर उज्जवल भविष्य बर शुभकामनाएं दीन।
पर्वतारोही नैना सिंह धाकड़ जगदलपुर जिला मुख्यालय ले 17 किलोमीटर दूरिहा टाकरागुड़ा गांव के रहइया हरे, वोमन बछर 2010 म पर्वतारोहण ले जुड़ीन। उन मन माऊंट एवरेस्ट के पहिली 23 मई के 8 हजार 516 मीटर ऊंच माऊंट लोहत्से म तको सफलता पूर्वक चढ़ई करीन। ये दूनों चोटी मन ल जीतइया वोह देश के दूसरइया माइलोगन हे। एवरेस्ट जीतइया राज्य के दूसरइया माइलोगन हरे, एकर पहिली 1993 म भेलई के सविता धपवाल ह बछेंद्री पाल संग एवरेस्ट म पहुंचे रिहिन।
ये बेरा म गृह मंत्री श्री ताम्रध्वज साहू, कृषि मंत्री श्री रविन्द्र चौबे, शिक्षा मंत्री डॉ. प्रेमसाय सिंह टेकाम, लोक स्वास्थ्य यांत्रिकी मंत्री गुरू रूद्रकुमार, खाद्य मंत्री श्री अमरजीत भगत, नगरीय प्रशासन और विकास मंत्री डॉ. शिव कुमार डहरिया, बस्तर के अपर कलेक्टर श्री अरविन्द एक्का, खेल अधिकारी श्री राजेन्द्र डेकाटे रिहिने।
बछर 2018 म आदिवासी अंचल सरगुजा संभाग के अम्बिकापुर शहर के निवासी अउ अंतरराष्ट्रीय पर्वरारोही माउंटेन मैन राहुल गुप्ता ह माउंट एवेरेस्ट ल जीतइया राज्य के अव्वल पर्वतारोही होए के गौरव पाए रिहिने।