रायपुर, 21 जुलाई 2020। छत्तीसगढ़ राज्य महिला आयोग के नवनियुक्त अध्यक्ष डॉ.किरणमयी नायक ह आज इहां राजधानी के जलविहार स्थित कार्यालय म विधिवत पूजा-अर्चना करके पदभार ग्रहण करिस। महिला बाल विकास मंत्री श्रीमती अनिला भेंड़िया ह छत्तीसगढ़ राज्य महिला आयोग के अध्यक्ष पद के प्रभार डॉ.किरणमयी नायक ल सौंपीस। उमन नवनियुक्त अध्यक्ष श्रीमती नायक ल बधाई अऊ ऊंखर सफल कार्यकाल बर शुभकामना दीन।
श्रीमती भेंड़िया ह कहिन के श्रीमती नायक ल कानूनी कामकाज संबंधी लंबा अनुभव रहे हे। एकर लाभ अब प्रदेश के महिला मन ल मिलही। ये बेरा म राजस्व मंत्री श्री जयसिंह अग्रवाल, लोक स्वास्थ्य यांत्रिकी मंत्री गुरू रूद्रकुमार, खाद्य अउ नागरिक आपूर्ति मंत्री श्री अमरजीत सिंह भगत, धरसीवा विधायक श्रीमती अनिता योगेन्द्र शर्मा,समाज कल्याण बोर्ड के नवनियुक्त अध्यक्ष श्रीमती करूणा शुक्ला संग कई जनप्रतिनिधि मन ह कार्यालय पहुंचके श्रीमती नायक ल अपन बधाई अऊ शुभकामना दीन।
श्रीमती नायक ह कहिन के महिला आयोग म कार्यभार ग्रहण करे के बाद उंखर प्राथमिकता मामला मन के जल्दी निराकरण के होही। इहां के सबो लंबित मामला मन के सूची बनाके समीक्षा करे जाही। उमन कहिन के कोनो प्रताड़ना ले पीड़ित महिला आयोग म आके शिकायत कर सकत हें। इहां घरेलू, सामाजिक या कार्यस्थल म प्रताड़ना जइसे सबो मामला म सुनवाई करे जाही। उमन कहिन के मोर 30 साल के कानूनी अनुभव कहिथे के महिला मन के अंदर के डर ल खतम करके ऊंखर हौसला ल उभारे के जरूरत हे, एखर बाद वो अपन लड़ाई खुदे लड़ सकत हे। उंखर कोसिस रइही के वो जादा ले जादा महिला मन ल न्याय देवा सकयं। एखर बर महिला मन ल घलोक खुल के आगू आए के जरूरत हे। ये बेरा म विभागीय अधिकारी-कर्मचारी संग ऊंखर परिजन उपस्थित रहिन।