जनचौपाल: भेंट-मुलाकात मुख्यमंत्री ह ऐतिहासिक अऊ पौराणिक महत्व के नगरी रतनपुर ल तहसील के दर्जा देहे के घोषणा करिन

रायपुर, मुख्यमंत्री श्री भूपेश बघेल ह आज इहां अपन निवास म आयोजित जन चौपाल , भेंट मुलाकात कार्यक्रम म छत्तीसगढ़ के प्रमुख तीर्थ स्थल, पुरातन नगरी अऊ मां महामाया के नगरी रतनपुर ल तहसील के दर्जा देहे के घोषणा करे हे ।
मुख्यमंत्री ह जन चौपाल म रतनपुर ले आए नागरिक मन के प्रतिनिधिमंडल ले गोठ बात करत बेरा ये घोषणा करिन। प्रतिनिधिमंडल ह मुख्यमंत्री ल बताइस कि 15 साल ले ओ मन रतनपुर ल तहसील के दर्जा देहे के मांग करत हे। आसपास के 49 ग्राम पंचायत मन ह घलोक एखर बर सहमति दिए हे। रतनपुर ले बिलासपुर करीबन करीबन 25 किलोमीटर अऊ कोटा 18 किलोमीटर दूरिहा हे। रतनपुर म तहसील कार्यालय सुरु होए ले नगरवासी मन ल बिक्कट सहूलियत होही। रतनपुर के जनसंख्या करीबन पच्चीस हजार हे। जुन्ना समय म रतनपुर ह छत्तीसगढ़ के राजवंस मन के राजधानी रहे हे।
ये बेरा म रतनपुर नगर पालिका अध्यक्ष सुश्री आशा सूर्यवंशी संग सर्वश्री शिवा पांडे, डॉ राजू श्रीवास, अभिषेक मिश्रा, पुष्पकांत, प्रबोध आनंद पांडे संग बहुत अकन नागरिक उपस्थित रहिन। नागरिक मन ह मुख्यमंत्री के प्रति आभार प्रकट करत ताली बजात मुख्यमंत्री के घोषणा के स्वागत करिन।