जनता के सुरक्षा सर्वोच्च प्राथमिकता : मुख्यमंत्री विष्णु देव साय ह बाढ़ प्रभावित जिला मन म राहत काम मन के गति तेज करे के दीन निर्देश

रायपुर, मुख्यमंत्री श्री विष्णु देव साय ह प्रदेश के बाढ़ प्रभावित जिला बीजापुर, सुकमा, दंतेवाड़ा अऊ बस्तर म राहत अऊ बचाव काम मन के जानकारी लेत अधिकारी मन ल जल्दी कार्रवाई करे के निर्देश देहे हें। मुख्यमंत्री ह स्पष्ट कहिन के जनता के सुरक्षा सर्वोच्च प्राथमिकता हे अऊ कोनो प्रभावित परिवार ल असुविधा झन होवय, एखर बर प्रशासन पूरा सक्रियता ले काम करय।
मुख्यमंत्री ह निर्देश देहे हें के राहत शिविर मन म रूके जम्‍मो मनखे मन ल भोजन, चिकित्सा सुविधा अऊ जरूरी सामान समय म उपलब्ध कराए जाय। उमन प्रशासन ल बाढ़ ले प्रभावित गाँव मन तक तुरंते सहायता पहुँचाए अऊ आपदा नियंत्रण कक्ष मन ले स्थिति के निगरानी करे के आदेश देहे हें।
जानबा हे के सरलग होवत बरसा ले प्रदेश के चार जिला मन म जनजीवन प्रभावित होय हे। आपदा प्रबंधन विभाग के मुताबिक, 26 अऊ 27 अगस्त ल सबले जादा वर्षा दंतेवाड़ा जिला म दर्ज करे गीस, जेमां क्रमशः 93.7 मिमी अऊ 118.4 मिमी बारिश होइस। सुकमा म 35 ले 109.3 मिमी, बीजापुर म 34.9 ले 50.2 मिमी अऊ बस्तर म 67.3 ले 121.3 मिमी वर्षा रिकार्ड करे गीस जेखर से 25 गाँव बाढ़ ले प्रभावित होए हे।