मानव संसाधन विकास मंत्रालय भारत सरकार ह करिस घोषणा
नई दिल्ली. ओपी जिंदल ग्लोबल यूनिवर्सिटी ल भारत सरकार के मानव संसाधन विकास मंत्रालय ह ’इंस्टीट्यूट आॅफ एमिनेन्स’ के रूप म मान्यता देहे हे। एखर संग ये प्रतिष्ठित यूनिवर्सिटी देश के टाॅप-10 निजी विश्वविद्यालय मन के सूची म सामिल हो गए हे अऊ अब ये पूरा विनियामक नियंत्रण ले मुक्त होके पूर्ण स्वायत्त विश्वविद्यालय के रूप म संचालित हो सकही। मंत्रालय ह मंगलवार के दिन नई दिल्ली म एखर घोषणा करिस।
ये बड़का उपलब्धि पाए म ओपी जिंदल ग्लोबल यूनिवर्सिटी के संस्थापक कुलाधिपति अउ संरक्षक श्री नवीन जिंदल ह प्रसन्नता जाहिर करत भारत सरकार अऊ मानव संसाधन विकास मंत्रालय के देश म अंतर्राष्ट्रीय स्तर के शिक्षा व्यवस्था उपलब्ध कराए बर करे जात उदीम ल सम्मानित करे म आभार जताए हें। उमन कहिन कि जिंदल ग्लोबल यूनिवर्सिटी के स्थापना मोर पिता श्री ओपी जिंदल जी के सुरता म, देश अऊ दुनिया के युवा मन ल नवा संभावना उपलब्ध करइया शैक्षणिक संस्थान के तौर म करे गए रहिस। उत्कृष्टता के प्रति हमर प्रतिबद्धता हमार दृष्टिकोण अऊ लक्ष्य म अंर्तनिहित हे। स्थापना के दस बछर के भीतरेच ’इंस्टीट्यूट आॅफ एमिनेन्स’ के मान्यता संस्थान के अनुभवी प्राध्यापक मन, प्रतिबद्ध कर्मचारी मन अऊ जिज्ञासु पढ़ईया लईका मन के अभूतपूर्व योगदान के कारण ही संभव होए हे। एखर से विश्वविद्यालय के विस्तार अऊ उत्कृष्टता अउ नवाचार ल बढ़ावा देहे के दिशा म नवा संभावनाएं पैदा होही। ये राष्ट्र निर्माण के दिशा म हमर यात्रा के नवा युग के घोषणा हे।
ओपी जिंदल ग्लोबल यूनिवर्सिटी के संस्थापक कुलपति प्रोफेसर (डाॅ.) सी राजकुमार ह कहिन कि ’इंस्टीट्यूट आॅफ एमिनेन्स’ के रूप म मान्यता हमला यूनिवर्सिटी के दसवां वर्षगांठ के समय मिले हे। उमन कहिन कि हमर पूरा टीम संस्थान ल टाॅप ग्लोबल यूनिवर्सिटी बनाए के लक्ष्य ल हासिल करे के दिशा म ’इंस्टीट्यूट आॅफ एमिनेन्स’ के मान्यता हासिल करे बर प्रतिबद्धता ले जुटे रहिस। उमन दूरदर्शी नेतृत्व अऊ प्रेरक योगदान बर कुलाधिपति श्री नवीन जिंदल के आभार जतात कहिन कि उमन शैक्षणिक स्वतंत्रता अऊ संस्थागत स्वायत्ता के संग समाज बर एक बड़ाका योगदान देवत ये विश्वविद्यालय के स्थापना करे रहिन। उमन भारत सरकार, मानव संसाधन विकास मंत्रालय, विश्वविद्यालय अनुदान आयोग अऊ अधिकार प्राप्त विशेषज्ञ समिति ल संस्थान के क्षमता मन म विश्वास जताए बर आभार ज्ञापित करिन।
हम आप मन ल बता देवन कि दिल्ली के राष्ट्रीय राजधानी क्षेत्र सोनीपत म स्थित ओपी जिंदल ग्लोबल यूनिवर्सिटी ह वल्र्ड यूनिवर्सिटी रैंकिंग म सामिल होए बर 15 बछर के विस्तृत अऊ महत्वाकांक्षी योजना तियार करे हे। जुलाई 2019 म विश्वविद्यालय ल क्यूएस कोति ले दुनिया के टाॅप-150 यंग यूनिवर्सिटी के सूची म जगह दिए गए रहिस, जेकर स्थापना ल 50 साल ले कम समय होय हे। जिंदल ग्लोबल यूनिवर्सिटी ये सूची म सामिल करे गए देश के इकलउता प्राइवेट यूनिवर्सिटी हे।