- डॉ. खूबचंद बघेल के जयंती म नरदहा म आयोजित पुरखा के सुरता कार्यक्रम म सामिल होइन मुख्यमंत्री श्री भूपेश बघेल
- मुख्यमंत्री ह नरदहा म छ.ग.मनवा कुर्मी क्षत्रिय समाज के बहुदेद्शीय भवन परिसर म नवनिर्मित अकतहा कमरा के करिन लोकार्पण
- भारी बारिश म घलोक मनखे पूरा उत्साह ले सुनत रहिन मुख्यमंत्री ल
रायपुर, मुख्यमंत्री श्री भूपेश बघेल ह कहिन कि छत्तीसगढ़ राज्य निर्माण के पहिली सपना देखइया डॉ. खूबचंद बघेल ह छत्तीसगढ़ राज्य के जऊन सपना देखे रहिन वइसनहे राज्य सरकार नवा छत्तीसगढ़ के निर्माण करत हे। डॉ. खूबचंद बघेल एक किसान के इहां पैदा होइन अऊ खेती-किसानी ले जुड़े रहिके, पढ़-लिखके डॉक्टर बनिन, स्वतंत्रता संग्राम म महत्वपूर्ण भूमिका निभाइन। उमनल एक महामानव के रूप म देखे जाथे। मुख्यमंत्री श्री भूपेश बघेल ह आज डॉ. खूबचंद बघेल के जयंती म रायपुर के आरंग विकासखण्ड के ग्राम नरदहा म आयोजित पुरखा के सुरता कार्यक्रम म सामिल होइन। मुख्यमंत्री श्री भूपेश बघेल ह डॉ. खूबचंद बघेल के तैलचित्र म पुष्प अर्पित करके छत्तीसगढ़ के प्रति ऊंखर योगदान ल याद करिन। मुख्यमंत्री के भाषण शुरू होए के संगेच बारिश घलोक शुरू हो गीस फेर मनखे भारी बारिश म घलोक पूरा उत्साह ले मुख्यमंत्री ल सुनत रहिन।
कार्यक्रम ल संबोधित करत मुख्यमंत्री श्री बघेल ह आगू कहिन कि डॉ. खूबचंद बघेल संग हमार पुरखा ह समृद्ध छत्तीसगढ़ के सपना देखे हे। छत्तीसगढ़ गांव मन म बसथे। जब तक इहां के गांव समृद्ध नइ बनही, तब तक छत्तीसगढ़ समृद्ध नइ हो सकय। राज्य सरकार इही दिशा म तेजी ले काम करत हे। चाहे वो किसान मन के कर्जमाफी हो, धान के 2500 रूपिया मूल्य, 400 यूनिट तक बिजली बिल हॉफ या फेर 12वीं तक पढ़ईया लईका मन ल निःशुल्क शिक्षा। राज्य सरकार छत्तीसगढ़ के चार चिन्हारी नरवा, गरूवा, घुरूवा अऊ बाड़ी के संरक्षण अऊ संवर्धन के दिशा म तेजी ले काम करत हे। पूरा प्रदेश म 1900 जगा म गौठान के निर्माण करे जात हे, 450 गौठान बनके तियार हो गे हे। ये हमर ग्रामीण अर्थव्यवस्था ल मजबूती प्रदान करे म अहम भूमिका निभावत हें। छत्तीसगढ़ के खान-पान अऊ तीज-त्यौहार ही हमर पहिचान हे। हरेली ले छत्तीसगढ़ म त्यौहार के शुरूआत होथे, राज्य सरकार ह घलोक ये निर्णय ले हे कि एला बड़े धूम-धाम ले मनाये जाही। मुख्यमंत्री ह ये बेरा म छत्तीसगढ़ मनवा कुर्मी क्षत्रिय समाज के बहुदेद्शीय भवन परिसर म नवनिर्मित अकतहा कमरा के लोकार्पण करिन अऊ परिसर म नीम के पौधा घलोक रोपिन। मुख्यमंत्री अऊ उपस्थित अतिथि मन ह समाज के पत्रिका उम्मीद-4 के विमोचन घलोक करिन।
नगरीय प्रशासन मंत्री डॉ. शिवकुमार डहरिया ह कहिन कि डॉ. खूबचंद बघेल छत्तीसगढ़ के अस्मिता के चिनहा यें। छत्तीसगढ़ के विकास बर जऊन सपना उमन देखे रहिन ओला मुख्यमंत्री श्री भूपेश बघेल के नेतृत्व म राज्य सरकार ह साकार करत हे। ये बेरा म जिला पंचायत रायपुर के अध्यक्ष श्रीमती शारदा देवी वर्मा, पं. रविशंकर शुक्ल विश्वविद्यालय के कुलपति श्री केशरीलाल वर्मा, मनवा कुर्मी क्षत्रिय समाज के केन्द्रीय अध्यक्ष डॉ. रामकुमार सिरमौर संग बड़ संख्या म मनवा कुर्मी क्षत्रिय समाज के पदाधिकारी अऊ ग्रामीणजन उपस्थित रहिन।