डोंगरी म अब बगरत हे संचार जाला

डोंगरी म अब बगरत हे संचार जाला
इंटरनेट के सुविधा ले गँवइहा मन अब जानही देश -दुनिया के तरक्की
मोबाइल टावर लगे ले गँवइहा मन म उछाह
रइपुर, 11 जुलाई 2022
राज्य के बस्तर संभाग के नक्सल प्रभावित इलाका म तको अब लउहे संचार नेटवर्क के सुविधा बगरे लगे हे। शासन कोति ले डोंगरी के दुर्गम, पहुंच विहीन, संवेदनशील जगा मन म सार्वभौमिक सेवा दायित्व निधि के माध्यम ले संचार सेवा ल बनाए अउ बगराए जावत हे। जिहां नेटवर्क नइ हे, उहां नवा मोबाइल टावर लगावत हे अउ मोबाइल नेटवर्क ल बढ़ाए के तको बूता करे जावत हे। जेकर ले कोनोच मनखे इंटरनेट सुविधा छूटे झन रहि सकय।
वर्तमान म संचार माध्यम के आवश्यकता हर कोनो ल हे। मोबाइल अउ इंटरनेट आज लोगन के जिनगी के अहम हिस्सा बन चुके हवय। सुकमा जिला म प्रशासन कोति ले संचार सुविधा के बगराव अउ पोठकरन के बूता लउहे कराए जावत हे। सुकमा म कतकोन अइसे जगा हवय जिहां बछर-बछर ले मोबाइल नेटवर्क नइ रिहिस हे। जेकर ले इहां के रइइया ग्रामीणजन देश-दुनिया के तरक्की ले अनजान रिहिस। उन ल मोबाइल फोन स्मार्टफोन के बारे म पता-च नइ रिहिस। ऑनलाइन लेन-देन तो दूरिहा के बात हरे। नवा पीढ़ी के युवा मन के आवस्कयता स्मार्ट फोन ले रिहि , फेर बने नेटवर्क अउ सिगनल के अभाव म वोमन इंटरनेट के दुनिया ले परिचित नइ रिहिन। आज परिस्थिति बदल गे हे। शासन के निर्देश म सार्वभौमिक सेवा दायित्व निधि कोति ले जिला म संचार बेवस्था ल पोठ करे बर जिला के अइसन क्षेत्र जिहां कोनो नेटवर्क नइ रिहिस। ओकर सर्वे करके उहां मोबाइल टावर स्थापित करे गे हे। जेमे तीन ठिन टावर जिला के संवेदनशील क्षेत्र म लगे हवय। कोण्टा विकासखण्ड के मिनपा अउ एल्मागुण्डा म मोबाइल टॉवर स्थापित करे गे हे।
सुकमा जिला के छिन्दगढ़ विकासखण्ड के कुमाकोलेंग म मोबाइल टॉवर स्थापित होए ले गाँव के मनखे मन अबड़ उछाह हवय। उहेंचे सुकमा विकासखण्ड के गीदमनाला म मोबाइल टॉवर लगे ले सूचना के आदान-प्रदान अब सहज साहज होगे हे।