इंजीनियरिंग विद्यार्थी छोटे उद्योग मन ले छत्तीगसढ़ ल बना सकत हें प्रोद्योगिकी हब
रायपुर, आज इहां रायपुर के एक निजी होटल म इंजीनियरिंग विद्यार्थी मन अऊ स्टार्ट-अप्स ल संबोधित करत ताईवान के सांसद प्रोफेसर यी शी चांग ह कहिन कि छत्तीसगढ़ म इलेक्ट्रॉनिक्स उद्योग मन के अपार संभावना हे। श्री चांग ह बताइस कि ताइवान एक अइसन देश हे जिहां प्राकृतिक संसाधन के नाम म कुछु नइ हे। ताइवान म साल भर म दू सौ ले जादा भूकंप आथे। एखर बाद घलव ताइवान तेज गति ले विकसित होवत हे, जेखर असल कारन ताईवान म छोटे उद्योग मन के बड़का मात्रा म इलेक्ट्रानिक्स उत्पाद मन के निर्माण करना हे।
श्री चांग ह बताइस कि भारत आधुनिक प्रौद्योगिकी के सॉफ्टवेयर क्षेत्र म विश्व म अग्रणी हे, फेर हार्डवेयर म भारत ल अभी बहुत कुछ करे के जरूरत हे। कहूं सूक्ष्म उद्योग मन कोति ले राज्य के युवा इलेक्ट्रानिक्स उत्पाद मन के निर्माण करहीं त भारत के विकास के गति अऊ तेज होही। श्री चांग ह कहिन कि इंजीनियरिंग के विद्यार्थी छोटे उद्योग मन ले छत्तीसगढ़ ल प्रौद्योगिकी हब बना सके हे। उमन कहिन कि ताइवान ये क्षेत्र म छत्तीसगढ़ ल पूरा सहयोग करही।
एकर पहिली कार्यक्रम के शुभारंभ करत चिप्स के मुख्य कार्यपालन अधिकारी श्री के.सी. देवसेनापति ह सबो अतिथि मन ल धन्यवाद ज्ञापित करत ट्रिपल आई टी, आई.आई.टी., आई.टी. अऊ जी.ई.सी. के तीन सौ ले जादा पढ़ईया लईका मन ल सम्बोधित करत कहिन कि ये अपन स्टार्ट-अप्स शुरू करे के एक अच्छा अवसर हे। विद्यार्थी छोटे-छोटे स्टार्ट-अप्स ले प्रदेश म नवाचार ल प्रोत्साहित कर सकत हें। राजीव गांधी इंस्टीट्यूट ऑफ कंटेम्परी स्टडीज के निदेशक श्री विजय महाजन ह घलोक अपन विचार प्रकट करिन।
ये बेरा म राज्य शासन के मुख्यमंत्री श्री भूपेश बघेल के सलाहकार श्री प्रदीप शर्मा ह पढ़ईया लईका मन ल नवाचार बर प्रोत्साहित करत राज्य म छोटे इलेक्ट्रानिक्स कम्पनी मन के स्थापना उपर बल दीन। ये बेरा म उद्योग विभाग के महाप्रबंधक श्री पी. अरूण प्रसाद, ट्रिपल आई. टी. के डायरेक्टर श्री प्रदीप सिन्हा घलोक उपस्थित रहिन।