रायपुर, तेलंगाना राज्य के पैदापल्ली जिला के गंगानगर म काम करत 8 मजदूर मन ल छोड़ाके वापस लाए गए हे। ये सबो मजदूर बलौदाबाजार जिला के कसडोल थाना क्षेत्र के देवरी चौकी के अंतर्गत ग्राम चांदन के निवासी हे। राज्य सरकार के निर्देश म जिला प्रशासन कोति ले बनाये गए संयुक्त टीम ह आज सबो मजदूर मन ल वापस लाके ऊंखर गांव चांदन म सकुशल सरपंच अऊ ऊंखर परिजन मन ल सौंप दीन। मजदूर मन म श्री बैरागी, श्रीमती शकुन्तला, ममता, रोहन सुमन, ससिता संग दू छोटे लइका सामिल हे। बंधक के हालात ले छुटे मजदूर मन के टीम म सामिल श्री रोशन महार ह बताइस कि ओ मन सब ओडीसा के श्री कुमार बेलपड़ा के संग ईंटा बनाए बर पैदापल्ली के गंगानगर गे रहिन। भट्ठा मालिक कोति ले हमला प्रताड़िता करे जात रहिस। नहाए, खाए अऊ बाजार जाय म कड़ा नजर रखत रहिस अऊ केवल एके मनखे ल बाहिर जाय देत रहिस। एडवांस के रूप म बहुत कम राशि देत रहिस जऊन कि हमार जीवन-यापन बर बहुतेच कम रहिस।
एडवांस के बदला काम होए के बाद घलोक मजदूरी के भुगतान नइ करे रहिस। हम काम छोड़के वापस घर लहुटे ल कहन त एखर बर मना कर दय। एक दम गुलाम के जिंदगी हम उहां बसर करत रहेंन। जिला प्रशासन सूचित करे म ऊंखर कोति ले श्रम विभाग, पुलिस, महिला अउर बाल विकास विभाग ल मिलाके संयुक्त टीम बनाये गइस अऊ इनंकर सहयोग ले हमला रिहाई मिलीस। संयुक्त टीम म जिला बाल संरक्षण अधिकारी श्री प्रकाश दास, श्रम निरीक्षक श्री संतोष कुमार कुर्रे, एएसआई श्री टी.आर. साहू, प्रधान आरक्षक राजकुमार राज आदि सामिल रहिन।
