दुर्ग : नारधा गौठान बनिस महिला मन न रोजगार के जरिया

ग्राम पंचायत नारधा म गौठान समूह के महिला मन ल अलग-अलग गतिविधी ले आर्थिक लाभ मिलत हे। कृषि अधिकारी मन के मार्गदर्शन पा के गौठान म वर्मी खाद के उत्पादन समूह कती ले करे जाथ हे , जेकर से बढ़िया आमदनी मिलत हे। गौठान म विभिन्न गतिविधि ले जुड़ के स्व सहायता समूह के महिला मन ह घर के खर्चा चलाए म सहयोग करत हे।
   वर्तमान म नारधा गौठान म सखी स्व सहायता समूह कती ले वर्मी कम्पोस्ट उत्पादन के काम बुता करे जाथ हे। समूह के महिला मन ल हर महीना लगभग तीन हजार रूपिया के आय प्राप्त होवत हे। अभी तक वर्मी ले एक लाख 78 हजार रूपिया के मुनाफा प्राप्त कर डारे हे। स्व सहायता समूह के महिला मन ह वर्मी कम्पोस्ट ले प्राप्त राशि के उपयोग अपने काम के विस्तार करे म लगात हे।
   गौठान म ही समूह के महिला मन ह मुर्गी पालन के बुता घलो करत हे। मुर्गीपालन ले अभी तक एक लाख के फायदा हो गय हे।
    अउ संग म गौठान म स्व सहायता समूह के महिला मन ह नारधा आदर्श गौठान म मछरी पालन ब बायो फ्लाक के निर्माण घलो करे जाथ हे। वर्तमान म बायो फ्लाक म मछरी डाले गय हे।
नारधा गौठान म ही सखी स्व सहायता समूह के महिला मन द्वारा गौठान म गाय पालन कर दुध बेच के बढ़िया कमई करत हे। गाय मन ले प्राप्त दुध ल अहिवारा के होटल म बेचरी कर के दूध ले लगभग 35 हजार रूपिया के शुद्ध कमई करत हे। अउ संग म गोबर बेचरि ले लगभग 15 हजार रूपिया के आय प्राप्त करत हे।
    बाड़ी विकास योजना के अंतर्गत नारधा गौठान म ही बाड़ी म सब्जी भाजी म पत्तागोभी, रमकेलीया, चेच भाजी, करमत्ता भाजी अउ प्याज के उत्पादन कर महिला मन ह ओला स्थानीय बाजार म बेच के बढ़िया आय अर्जित करत हे। अभी तक बाड़ी ले समूह ल लगभग एक लाख के आय प्राप्त हो गए हे।