दुर्ग म राज्यपाल : डफ़्टन अऊ अरुणिमा के उदाहरण देके दिव्यांगजन मन ल बताइन के तुँमन मेर जबर हौसला हे

– राज्यपाल सुश्री अनसुइया उइके जी ई फाउंडेशन के कार्यक्रम उड़ान म हिस्सा लेहे पहुंचिन
दुर्ग, जी ई फाउंडेशन के कार्यक्रम म भाग लेहे पहुंचे राज्यपाल सुश्री अनसुइया उइके ह दिव्यांग लइका मन ल आशीर्वाद देहे के बाद दिल्ली म होए अग्नि दुर्घटना म मृत 43 मनखे मन ल श्रद्धांजलि देके अपन उद्बोधन के शुरुआत करिन। उमन कहिन कि ये मोर सौभाग्य हे कि अतीक प्रतिभाशाली लइका मन के संग समय बिताए के अवसर मोला मिल पाइस।

उमन कहिन के दिव्यांगजन मन म गहिर प्रतिभा होथे। मोला कुछ बात सुरता आथे, जेमन मोर दिल ल छू लेहे रहिन। पउर साल सोशल मीडिया म वायरल होय वो वीडियो सुरता आवत हे जऊन पुणे हाफ मैराथन ले संबंधित रहिस। ये मां केवल एक पैर म ही जावेद चौधरी नाम के युवक ह 10 किमी के दौड़ पूरा कर ले रहिस। दौड़ पूरा करे के बाद वो युवा खूब झूमे रहिस। वोखर उल्लास ल देखके लाखों मनखे घलोक झूमे होही। ये वाकया मनुष्य के असीमित शक्ति के दास्तान कहिथे। अरुणिमा सिन्हा के उदाहरण लेवव जे ह 1 पैर म ही एवरेस्ट जइसे शिखर छू लिस। अभी डफ़्टन के बारे म सुनेंव, ओ ह दृष्टिबाधित हे अऊ 400 फ़ीट के चढ़ाई चढ़ लीस।

उमन आगू बताइन के ए घटना मन बताथें कि हौसला रखव त असंभव काम घलोक कर सकत हव। राज्यपाल ह जी ई फाउंडेशन ल ये बने काम मन बर बधाई दीन। उमन कहिन कि दिव्यांगजन मन के बेहतरी बर जउन काम करे जाथे वो काम श्रेष्ठ काम हे। उमन कहिन कि आप सबो मन के भीतरी म प्रतिभा लुकाये हे जेला मैं ह देखे हंव। आप मन खेल म अइसनहे अपन हुनर देखाव। आप मन पैरालिम्पिक खेल मन म घलोक अपन प्रतिभा दिखा सकत हव।

राज्यपाल ह कहिन कि आप मन के सुंदर आयोजन ल देखके मन प्रसन्न होइस। आप सबो मन ले में बातचीत करेव अऊ मोला बहुत खुशी होइस। उमन ये बेरा म लइका मन के उज्ज्वल भविष्य के कामना करिन अऊ अच्छा प्रदर्शन करइया खिलाड़ि मन ल पुरस्कृत घलोक करिन। ये मौका म बीएसपी के सीईओ श्री अनिरबन दास गुप्ता ह घलोक अपन संबोधन दीन, उमन कहिन कि ए लइका मन ल सिम्पैथी नहीं इम्पैथी चाही। जी ई फाउंडेशन के पूरा नाम गोल्डन इम्पैथी हे जऊन इही भावना ल सार्थक करे हे। ये मौका म दिव्यांग लइका मन ह खेल अउ संगीत के प्रदर्शन घलोक करिन। ये मौका म आईजी श्री विवेकानंद सिन्हा, कलेक्टर श्री अंकित आनंद, वरिष्ठ पुलिस अधीक्षक श्री अजय यादव अउ आन अधिकारी उपस्थित रहिन।