धमतरी : कलेक्टर के पहल म युवरानी ल मिलही स्कूल म शिक्षा

एके दिन म युवरानी के बनिस  आयुष्मान व राशनकार्ड
धमतरी, 17 जनवरी 2024 । कलेक्टोरेट म आयोजित जनदर्शन म जिला के दूर-दराज ले अपन समस्या, शिकायत अऊ मांग लेके मनखे पहुंचे रहिन। एमां अपन 13 साल के मानसिक रूप ले कमजोर बेटी युवरानी ल लेके बीना कंवर घलोक पहुंचे रहिस। कलेक्टर सुश्री नम्रता गांधी के ल बीना ह बताइस कि वो कुरूद विकासखंड के ग्राम कन्हारपुरी ले आए हे। ओखर बेटी मानसिक रूप ले कमजोर हे, ते पाए के वो ओला स्कूल म नइ पढ़ा पावत हे। संगे ए नोनी के आयुष्मान कार्ड अऊ राशन कार्ड घलोक नइ बने हे। कलेक्टर सुश्री नम्रता गांधी ह बीना के बात ल संवेदनशीलता के संग सुनिस अऊ तुरंते समाजकल्याण अऊ खाद्य विभाग के अधिकारी मन ल निर्देशित करिस। संगे युवरानी के आयुष्मान कार्ड बनाए ल घलोक कहिन। विभागीय अधिकारी मन ह थोरकेच बेरा म आयुष्मानकार्ड, राशन कार्ड अऊ नोनी के स्कूल म प्रवेश के प्रक्रिया पूरा कर दीन।
कलेक्टर सुश्री गांधी ह नोनी ले आत्मीय बातचीत करिन अऊ ओखर नाम, पता संग खेल म दिलचस्पी के बारे म पूछिस। नोनी ह कलेक्टर ल बड़ मासूमियत ले धन्यवाद दीस। कलेक्टर ह नोनी ल पढ़ाए, चित्रकारी आदि सिखाए बर कहिन। बीना कंवर ह नोनी के आयुष्मान कार्ड अऊ राशनकार्ड मिले अऊ नोनी के शिक्षा बर स्कूल म प्रवेश प्रक्रिया चालू होए म कलेक्टर सुश्री गांधी ल धन्यवाद दीस अऊ कहिन कि युवरानी के आयुष्मान कार्ड बन जाय ले अब एखर इलाज म बने सहिन हो पाही उहें राशन कार्ड बन जाय ले अब ओला अलग से राशन अउ आन शासकीय योजना मन के लाभ मिल पाही। संगेच  नोनी युवरानी ह खुशी ले झूम उठिस।