धान के जइसे आन फसल के उत्पादन बर घलोक मिलही आसान ऋण : मुख्यमंत्री

रायपुर, मुख्यमंत्री श्री भूपेश बघेल ह कहिन कि धान के जइसे आन फसल मन के उत्पादन बर घलोक सहकारी बैंक ले आसानी ले ऋण मुहैया कराए जाही। एखर बर ऋणमान म घलोक बदलाव करे जाही ताकि जादा ले जादा किसान दलहन-तिलहन अऊ नकद फसल के खेती करके जादा आमदनी कमा सकयं। उमन कहिन कि राज्य म राजीव गांधी किसान न्याय योजना, गोधन न्याय योजना के उत्साहजनक परिणाम मिलत हे। दलहन उत्पादन म दुसरा फसल के रूप म राज्य म 17 फीसदी अऊ तिलहन म 13 प्रतिशत के वृद्धि दर्ज करे गए हे। श्री बघेल बिलासपुर म तीन दिवसीय राज्य स्तरीय कृषि समृद्धि मेला के समापन समारोह ल संबोधित करत रहिन। मुख्यमंत्री ह ये बेरा म कृषि विभाग के कई योजना मन के अंतर्गत किसान मन ल आदान सामान अउ अनुदान राशि के चेक वितरित करिन। समारोह के अध्यक्षता कृषि मंत्री श्री रविन्द्र चौबे ह करिन। राजस्व अउ आपदा प्रबंधन मंत्री श्री जयसिंह अग्रवाल विशेष अतिथि के रूप म मौजूद रहिन।