धान विक्रय बर किसान पहिलीच दिन ले अपन बारदाना म ला सकही धान: कृषि मंत्री श्री रविन्द्र चौबे

रायपुर, कृषि अऊ जल संसाधन मंत्री श्री रविन्द्र चौबे ह कहे हें कि राज्य म एक दिसंबर ले शुरू होवया धान खरीदी के पहिली दिन ले ही किसान भाई अपन बारदाना म धान विक्रय बर ला सकहीं। किसान मन के सुविधा ल ध्यान म रखत मुख्यमंत्री श्री भूपेश बघेल ह ये निर्णय लेहे हे। किसान मन ल धान बेचे म कोनो प्रकार के परेशानी झन होवय, एला ध्यान म रखत राज्य सरकार सबो प्रकार के व्यवस्था करत हे। राज्य म ये साल 105 लाख मीटरिक टन धान के खरीदी अनुमानित हे, जेखर एवज म किसान मन के खाता म करीबन 27 हजार करोड़ रूपिया अंतरित करे जाही। किसान मन ल पहिली दिन ले ही राशि के भुगतान करे जाही।
कृषि अऊ जल संसाधन मंत्री श्री चौबे आज राजनांदगांव जिला के छुरिया विकासखंड के ग्राम कुमरदा म दीपावली मिलन अऊ कृषक सम्मान समारोह ल सम्बोधित करत रहिन। ये बेरा म उमन 2.85 करोड़ रूपिया के लागत वाले कोलियारी जलाशय अऊ नहर लाईनिंग काम के भूमिपूजन करिन अऊ उत्कृष्ट कृषक मन ल चिनहा अऊ प्रशस्ति पत्र देके सम्मानित करिन। कृषि मंत्री ह ये मौका म राज्य स्तरीय कृषि मेला राजनांदगांव म कराए के घलोक घोषणा करिन। उमन ग्राम कुमरदा म सीसी रोड निर्माण बर 50 लाख रूपिया के स्वीकृति दीन।
कृषि मंत्री श्री रविन्द्र चौबे ह कहिन कि शासन ह गोधन न्याय योजना शुरू करे हे। गौठान मन म ये योजना के तहत 2 रूपिया प्रति किलो म गोबर के खरीदी करे जात हे। स्व-सहायता समूह के महिला मन गौठान म कई ठन आर्थिक गतिविधि मन के माध्यम ले सशक्त होवत हे। गौठान मन ल ग्रामीण औद्योगिक पार्क विकसित करे के काम शुरू करे गए हे, ताकि ग्रामीण लघु उद्योग के गतिविधि मन ल बढ़ावा देहे जा सकय। राजीव गांधी ग्रामीण भूमिहीन कृषि मजदूर न्याय योजना म भूमिहीन किसान मन ल हर बछर 6 हजार रूपिया के प्रोत्साहन राशि देहे जाही। मंत्री श्री चौबे ह कहिन कि पउर साल के तुलना म ये साल पौने तीन लाख किसान मन ह जादा पंजीयन कराए हें।
ये बेरा म अध्यक्ष छत्तीसगढ़ राज्य आन पिछड़ा वर्ग विकास प्राधिकरण श्री दलेश्वर साहू, अध्यक्ष छत्तीसगढ अंत्यावसायी वित्त विकास निगम श्री धनेश पाटिला, विधायक खुज्जी श्रीमती छन्नी साहू ह घलोक कार्यक्रम ल सम्बोधित करिन। कार्यक्रम म उपाध्यक्ष छत्तीसगढ़ गौ सेवा आयोग श्री मन्ना यादव, सदस्य छत्तीसगढ खादी ग्रामोद्योग बोर्ड श्री श्रीकिशन खंडेलवाल, पूर्व विधायक श्री भोलाराम साहू, पूर्व विधायक श्री प्रकाश यादव, पूर्व विधायक श्री इमरान मेमन आन जनप्रतिनिधि अऊ बड़ी संख्या म ग्रामीणजन उपस्थित रहिन।