मध्यप्रदेश के मुख्यमंत्री डॉ. मोहन यादव होही उद्घाटन कार्यक्रम के मुख्य अतिथि
रायपुर, छत्तीसगढ़ राज्य स्थापना दिवस राज्योत्सव 2024 के आयोजन ल लेके तैयारी जोर-शोर ले चलत हे। तीन दिन के राज्योत्सव के भव्य आयोजन 4 नवम्बर ले 6 नवम्बर तक राज्योत्सव स्थल, नवा रायपुर अटल नगर म होही। राज्योत्सव स्थल म मुख्य मंच ले लेके पूरा परिसर के साज-सज्जा के काम तेजी ले कराए जात हे। शासकीय योजना अउ उपलब्धि मन के प्रचार-प्रसार बर सबो विभाग मन के अधिकारी अपन-अपन विभाग के प्रदर्शनी स्टॉल लगाए के तैयारी म जुटे हें।
राज्य स्थापना दिवस राज्योत्सव 2024 के उद्घाटन 4 नवम्बर के संझा 6 बजे मध्यप्रदेश के मुख्यमंत्री डॉ. मोहन यादव करहीं। उद्घाटन कार्यक्रम के अध्यक्षता मुख्यमंत्री श्री विष्णु देव साय करहीं। छत्तीसगढ़ विधानसभा अध्यक्ष डॉ. रमन सिंह कार्यक्रम म अति विशिष्ट अतिथि होही। राज्यपाल श्री रमेन डेका के मुख्य आतिथ्य म 5 नवम्बर के राज्योत्सव के कार्यक्रम के शुभारंभ होही। मुख्यमंत्री श्री विष्णु देव साय ए अवसर म कार्यक्रम के अध्यक्षता करहीं। राज्य अलंकरण समारोह अउ राज्योत्सव के समापन 6 नवम्बर के उप राष्ट्रपति श्री जगदीप धनखड़ के मुख्य आतिथ्य म होही। ए अवसर म राज्यपाल श्री रमेन डेका कार्यक्रम के अध्यक्षता करहीं। मुख्यमंत्री श्री विष्णु देव साय अउ विधानसभा अध्यक्ष डॉ. रमन सिंह कार्यक्रम म अति विशिष्ट अतिथि होही।